GÜCLÜ LEYSAN ŞƏKİNİN YAŞAYIŞ MƏNTƏQƏLƏRİNƏ CİDDİ ZİYAN VURMUŞDUR
Şəki, 25 iyun (AZƏRTAC). İyunun 24-də axşam saatlarında baş vermiş təbii fəlakət - güclü leysan Şəki rayonunun bir sıra yaşayış məntəqələrində yol infrastrukturuna, elektrik verilişi xətlərinə, əkin sahələrinə, vətəndaşların şəxsi təsərrüfatlarına ciddi ziyan vurmuşdur.
Şəhər fövqəladə hallar komissiyası sədrinin müavini Valeh Ələkbərov AZƏRTAC-ın müxbirinə bildirmişdir ki, Baş Kəldək kəndi ilə Oraban kəndi arasındakı körpünü sel suları yuyub aparmış, kəndlərarası əlaqə kəsilmişdir. Baş Kəldək kəndində 2 evin divarları dağılmış, sel suları kəndi iki hissəyə ayırmış, yollar yararsız hala düşmüşdür. Baş Küngüt və Bideyiz kəndlərində 30-dan çox evi su basmış, mənzillərə ciddi ziyan dəymişdir. Bideyiz kəndinin girəcəyində yolun asfalt örtüyü tam yarasız vəziyyətə düşmüşdür.
Çələbixan qəsəbəsində 30 evi su basmış, 17 baş qoyunu, 600-ə yaxın toyuq-cücəni sel aparmışdır. Kiçik və Böyük Dəhnə kəndlərində də həyətləri su basmış, xeyli heyvan və ev quşlarını su aparmışdır. Baltalı-Qoxmuq yolunda yüksəkgərginlikli elektrik xətti aşmış, Qudula və Qaradağlı kəndlərində elektrik verilişi xətləri sıradan çıxmışdır. Ağacların, elektrik dirəklərinin aşması nəticəsində bəzi kəndlərin elektrik enerjisi ilə təchizatında fasilələr yaranmışdır. Sel suları Göybulaqda da 2 evə ziyan vurmuş, 4 ton taxılı su aparmış, bir nəfər yüngül xəsarət almışdır.
Hazırda şəhər fövqəladə hallar komissiyası əlaqədar strukturlarla birgə təbii fəlakətin nəticələrinin aradan qaldırılması üçün yerlərdə operativ tədbirlər həyata keçirir.
Bölmənin digər xəbərləri
