GÜCLÜ YAĞIŞ VƏ DOLU GÜRCÜSTAN PAYTAXTINA CİDDİ ZİYAN VURMUŞDUR
Tbilisi, 23 iyun (AZƏRTAC). İyunun 23-də gecə Tbilisi şəhərində güclü dolu və yağış yağmışdır. Bir neçə saat ərzində düşən dolu və yağış nəticəsində şəhərin kanalizasiya sistemində problemlər yaranmış, sel Tbilisinin küçələrini, 3 evi, “Saracaşvili” və “Axmeteli” metro stansiyalarını basmışdır. Şəhər bələdiyyəsinin fövqəladə vəziyyət xidməti təxminən 100 çağırış əsasında hadisə yerinə getmişdir.
Sel ən çox şəhərin Qldani və Lilo yaşayış massivlərini basmış, “Lilo” satış-yarmarkasında məhsulları yararsız vəziyyətə salmışdır. Şəhər bələdiyyəsindən verilən məlumata görə, təbii fəlakətin nəticələri aradan qaldırılır, xüsusi komissiya zərərin məbləğini müəyyənləşdirir.
İslam Əliyev
AZƏRTAC-ın xüsusi müxbiri
Tbilisi
Bölmənin digər xəbərləri
