Gürcüstanda milli azlıqlara hüquqi xidmətlə bağlı yeni layihəyə start verilir
Tbilisi, 18 iyun, AZƏRTAC
Gürcüstanda əsasən Azərbaycan dilində xəbərlər yayan interpress.ge portalı hüquqi xidmətlər sahəsində yeni layihəyə başlayır. Layihə əsasında vətəndaşlar öz hüquqlarını daha asan müdafiə edə biləcəklər.
Bu barədə AZƏRTAC-a portalın baş direktoru Nahid Qurbanov məlumat verib.
Onun sözlərinə görə, interpress.ge hüquqi xidmətlərin rəqəmsallaşdırılması, etnik azlıqların hüquqi yardıma çıxış imkanlarının genişləndirilməsi və süni intellekt texnologiyalarının hüquq sahəsinə tətbiqi məqsədilə yeni layihənin icrasına start verir.
Nahid Qurbanov bildirib ki, əsas məqsəd hüquqi xidmətləri insanların yaşadığı yerə, danışdığı dilə və maliyyə imkanlarına bağlı olmadan hər kəs üçün əlçatan etməkdir.
"Uzun illərdir ki, Gürcüstanda yaşayan etnik azlıqların, xüsusilə də azərbaycandilli əhalinin informasiya və hüquqi xidmətlərə çıxışı ilə bağlı problemləri yaxından müşahidə edirik. Bir çox insanlar dövlət qurumlarına müraciət etməkdə, hüquqi sənədlər hazırlamaqda və öz hüquqlarını müdafiə etməkdə çətinlik çəkirlər. Bu layihə həmin problemlərin həllinə töhfə vermək məqsədi daşıyır", – deyə Nahid Qurbanov qeyd edib.
Layihə çərçivəsində yaradılan platforma istifadəçilərə öz ana dillərində hüquqi məlumat almaq, müxtəlif hüquqi sənədlər hazırlamaq və peşəkar hüquqi yardım əldə etmək imkanı yaradacaq.
Layihə çərçivəsində yalnız təsdiqlənmiş vəkillər sistemə qoşulacaq və istifadəçilər hüquqi problemlərinin xarakterinə uyğun mütəxəssislərlə videogörüşlər keçirə biləcəklər.
Yeni layihənin vacib məqamlarından biri də odur ki, istifadəçilər yaşadıqları yerdən çıxmadan vəkillərlə videoəlaqə yarada və peşəkar hüquqi yardım ala biləcəklər. Bu həm vaxt, həm də maliyyə baxımından vətəndaşlar üçün böyük üstünlük yaradacaq.
Layihənin 1 il ərzində həyata keçirilməsi nəzərdə tutulur. Bu müddət ərzində platformanın texniki imkanlarının genişləndirilməsi, hüquqi xidmətlərin inkişaf etdirilməsi və istifadəçi auditoriyasının əhəmiyyətli dərəcədə artırılması planlaşdırılır.
Bölmənin digər xəbərləri
