Gürcüstanda şəhərlərarası sərnişindaşıma bərpa edilib
Tbilisi, 25 fevral, AZƏRTAC
Gürcüstanda 2 aylıq fasilədən sonra şəhərlərarası nəqliyyatın fəaliyyəti bu gündən bərpa olunub.
AZƏRTAC xəbər verir ki, bununla əlaqədar Gürcüstan hökuməti qərar qəbul edib. Qərara əsasən, fevralın 25-dən şəhərlərarası avtobusların fəaliyyəti və sərnişin daşınmaları bərpa olunur. İki gündən sonra isə ölkədaxili dəmir yolu nəqliyyatı ilə sərnişin daşınması bərpa olunacaq.
Gürcüstanın iqtisadiyyat və davamlı inkişaf naziri Natia Turnava hökumətin bugünkü iclasından sonra deyib ki, dəmir yolunun hazırlanması üçün müəyyən zaman lazımdır. Bu səbəbdən 2 gündən sonra dəmir yolları ilə hərəkət bərpa olunacaq və cədvəl elan ediləcək.
Qeyd edək ki, Gürcüstanın Dəmir Yolları Şirkəti fevralın 25-dən biletlərin onlayn satışına başlayıb. Fevralın 26-dan isə biletləri kassalardan almaq mümkün olacaq.
Şirkətdən bildirilib ki, dəmir yollarında hərəkət Tbilisi-Batumi-Tbilisi, Tbilisi-Zuqdidi-Tbilisi, Tbilisi-Ozurgeti-Tbilisi, Tbilisi-Poti-Tbilisi, Tbilisi-Kutaisi-Tbilisi istiqamətlərində bərpa olunur.
Qeyd edək ki, pandemiya səbəbindən Gürcüstanda dəmir yolu nəqliyyatı ilə sərnişin daşınması qadağan olunmuşdu.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
