QAN YADDAŞI
HAAQADA “QAÇQIN QADINLARIN DURUMU” MÖVZUSUNDA KONFRANS KEÇİRİLƏCƏKDİR
Benilüks Azərbaycan Təşkilatları Əlaqələndirmə Şurasının fəxri sədri, Azərbaycanın Belçika Krallığında və Lüksemburq Hersoqluğundakı səfirliyinin birinci katibi Fuad Hümbətov AZƏRTAC-ın xüsusi müxbirinə bildirmişdir ki, erməni işğalını və vəhşiliklərini beynəlxalq ictimaiyyətə çatdırmaq istiqamətində tədbirlərin keçirilməsi davam edir.
Hollandiya-Azərbaycan-Türkiyə Kültür Dərnəyi tərəfindən Xocalı soyqırımı qurbanlarının xatirəsinə Haaqada ucaldılmış abidənin açılış mərasimindən sonra bu şəhərdə “Qaçqın qadınların durumu” mövzusunda növbəti tədbir keçiriləcəkdir. “Avrasiya” fondunun rəhbəri Fatma Aktaş tərəfindən təşkil edilən konfransda Milli Məclisin deputatı Həvva Məmmədova ilə yanaşı tarixşünas alimlərimiz də çıxış edəcək, erməni terrorunu bütün dünyaya yayan hollandiyalı fotoqraf Gerard Skarqonun fotosərgisi nümayiş etdiriləcəkdir.