HANS TİLKOVSKİ TOFİQ BƏHRAMOVUN ABİDƏSİNİ ZİYARƏT ETMİŞDİR
Bakı, 7 aprel (AZƏRTAC). Veteran futbolçu, ötən əsrin 60-70-ci illərində Almaniya millisinin qapısını qorumuş Hans Tilkovski aprelin 7-də dünya şöhrətli hakim, mərhum Tofiq Bəhramovun abidəsini ziyarət etmiş, heykəlinin önünə gül dəstələri qoymuşdur.
Tədbirdə AFFA rəhbərliyi, Azərbaycan futbolunun veteranları, futbol ictimaiyyətinin nümayəndələri iştirak etmişlər.
Azərbaycanda olmağından böyük fərəh hissi keçirdiyini deyən Hans Tilkovski, Tofiq Bəhramovla görüşə bilməməsini təəəsüflə qeyd etmişdir. “Heyif ki, Tofiq Bəhramov bu gün aramızda yoxdur. Görüşə bilsəydik, o illəri yenidən xatırlayar, xeyli söhbət edərdik”.
Səfər təəssüratlarını bölüşən H.Tilkovski daha sonra jurnalistlərin suallarını cavablandırmışdır. Tədbir iştirakçıları Tofiq Bəhramovun abidəsi önündə xatirə şəkli çəkdirmişlər.
Xatırladaq ki, 1966-cı ildə keçirilmiş dünya çempionatının final görüşündə məhz Hans Tilkovskinin qoruduğu qapıya İngiltərə yığmasının vurduğu üçüncü qolun hesaba alınmasında Tofiq Bəhramov yan xətt hakimi kimi qətiyyət nümayiş etdirmiş və bunun nəticəsində “Qızıl fit” mükafatına layiq görülmüşdü.
Bölmənin digər xəbərləri
