DÜNYA
Harbin buz və qar festivalı “Ginnesin rekordlar kitabı”na düşüb
Pekin, 12 yanvar, AZƏRTAC
Çinin şimal-qərbindəki Harbin şəhərində təşkil olunan buz və qar festivalının “Buz və qar dünyası” parkı “Ginesin rekordlar kitabı”na düşüb.
AZƏRTAC xəbər verir ki, Harbin “Buz və qar dünyası” parkı dünyada buz və qar mövzusunda sahəsinə görə ən böyük sərgi kimi tanınıb.
Təşkilatçıların açıqlamasında deyilir ki, parkın sahəsi ildən-ilə genişləndirilərək 816 min 682 kvadratmetrə çatıb. Parkda Harbindən keçən və qışda səthi bir metrədək donan Sonhua çayından yığılan 250 min kubmetr buzdan və qardan hazırlanan 1000-dən çox heykəl, fiqur, dünyanın müxtəlif ölkələrindəki tanınmış memarlıq abidələrinin, o cümlədən bina və körpülərin, nağıl və cizgi filmlərindəki qəsrlərin maketləri nümayiş olunur. Buzdan hazırlanan maketlər içəridən işıqlandırıldığı üçün gecələr xüsusilə gözəl mənzərə yaranır.
Buz və qar fiqurlarının hazırlanmasında çinli və xarici mütəxəssislər birgə çalışıb. Bu maketlərin bəzilərinin hündürlüyü 50 metrə, uzunluğu 100 metrə çatır.
Dekabrın son günlərində başlayan festival martın əvvəlinədək davam edir. Festival çərçivəsində onlarla müxtəlif tədbir, o cümlədən həvəskarlar arasında qış idman növləri yarışları, kütləvi nikah mərasimi, fotosərgi keçirilir.
Qeyd edək ki, Harbin dünyanın qış turizm mərkəzlərindən biridir. Çinin şimal-şərqində yerləşən bu şəhərdə qışda soyuq Sibir küləkləri hakim olur. Qış fəslində orta aylıq temperatur mənfi 20 dərəcə təşkil edir. Axşam və gecə vaxtı temperatur bəzən mənfi 40 dərəcəyə enir. Yerli hökumət bu cür hava şəraitindən səmərəli istifadə edərək hər il milyonlara yerli və əcnəbi turisti Harbinə gəlməyə sövq edir.
Ardıcıl 25 ildir keçirilən festival təkcə Çində deyil, dünyada da buz və qar mövzusunda ən iri tədbirlərdən biri olduğu üçün hər il xeyli yerli və əcnəbi turist Harbini ziyarət edir. Hər gün parka gələn insanların orta sayı bu il əhəmiyyətli dərəcədə artaraq 30 minə çatıb. Şəhərdə mehmanxana nömrələri isə əvvəlcədən bron edilib. Üçgünlük Yeni il tətilində Harbini 3,05 milyon turist ziyarət edib və turizm sahəsində dövriyyə 5,91 milyard yuana (təxminən 828 milyon ABŞ dolları) çatıb ki, bu da hər iki göstərici üzrə tarixi rekorddur.
Şahin Cəfərov
AZƏRTAC-ın xüsusi müxbiri
Pekin