HAVAY ADALARINDA İSLAM İNCƏSƏNƏTİNİN MUZEY-QƏSRİ AÇILMIŞDIR

30.03.2004 [16:41]
Çap et
A⁺ A^-

AZƏRTAC Müstəqil İslam İnformasiya Agentliyindən aldığı xəbərə görə, Havay adalarında İslam İncəsənəti muzeyi bərpa olunduqdan sonra yenidən fəaliyyətə başlamışdır. Muzey-qəsrin nahar salonu səhradakı çadırı xatırladır.Tamaşaçıları ən çox döşəmədəki mozaik ornamentlər və divarlardakı qobelenlər heyran edir. XIII əsrə aid olan İran mehrabı muzeyin ən maraqlı əşyalarındandır.

Hələ gəncliyindən İslam dünyası incəsənətinə məftun olan Doris Dyuku həm də Havay adaları daim özünə cəlb edirdi. 30 yaşında çoxmilyonluq mirasa sahib olması ona hər iki arzusuna qovuşmağa imkan verdi. Doris okeanın sahilində sonradan “Şanqri La” adlandırdığı qəsrə sahib oldu. O, qəsri məşhur nağıl qəhrəmanı Əlibabanın sığınacağı şəklində bəzəmişdir. Müsəlman incəsənətinə məftunluğuna sadiq qalan Doris, sonralar da qəsr üçün aldığı ev əşyalarını bu üsluba uyğun şəkildə seçməkdə davam etmişdir.

D.Dyuk 1993-cü ildə 80 yaşında vəfat etdikdən sonra onun vəsiyyətnaməsinə əsasən, qəsrin qapıları bütün insanların üzünə açıq olmalıydı. O vaxtdan bəri qəsrin kandarına ayaq basan hər bir turist sanki sehrli aləmə düşür.

D.Dyuk ömrünün axırınadək müsəlman incəsənətinin gözəlliyinə pərəstiş etməkdən usanmamışdı.