HAZIRDA ARAZ ÇAYINDAN KÜRƏ SANİYƏDƏ 400 KUBMETR SU AXIR
İmişli, 2 iyun (AZƏRTAC). Kür çayının daşması nəticəsində daşqınlardan əziyyət çəkən rayonlarda Prezident İlham Əliyevin göstərişlərinə uyğun olaraq kompleks işlər davam etdirilir.
Araz çayının yeni qolunda da müvafiq işlər görülür. Hazırda Araz çayından Kürə saniyədə 400 kubmetr su axır. Yeni qola axan suyun sürəti saniyədə 210 kubmetrdir.
Araz çayının yeni qolu ilə axan su İmişli rayonunun Çaxırlı, Qızılkənd, Məzrəli kəndlərini keçərək Qulubəyli kəndinin yaxınlığında Telperi bataqlığına, habelə örüş yerlərinə axır. Qabaqcadan planlaşdırılmış trayektoriyaya əsasən su Biləsuvar rayonunun çöllük hissəsindən keçəcəkdir.
“Meliorasiya və Su Təsərrüfatı” Açıq Səhimdar Cəmiyyətinin sədri Əhməd Əhmədzadənin sözlərinə görə, Çaxırlı kəndində 500 hektar əkin sahəsinin su altında qalması mümkündür. Dəymiş ziyana görə kompensasiya ödəniləcəkdir.
İmişli, Saatlı və Sabirabad rayonlarında ümimi vəziyyət sabitdir. Hazırda Kürün Sabirabad rayonunun Çığırğan kəndi istiqamətində yardığı bənddə bərpa işləri davam etdirilir. Bəndin yarılan 80 metrlik hissəsinin 35-40 metri artıq bağlanmışdır. Ərazidə xeyli sayda canlı qüvvə çalışır, işə onlarla texnika cəlb olunmuşdur.
Qeyd edək ki, bu ərazidə bəndin yarılması nəticəsində Sabirabad rayonunun Azadkənd, Poladtuğa, Beşdəli və digər kəndlərinin əkin sahələri su altında qalmışdır.
Fəlakət zonasının orta məktəblərində şagirdlər arasında mərkəzləşdirilmiş imtahanların keçirilməsi məsələsi ilə əlaqədar Təhsil Nazirliyinin bir qrup əməkdaşı təbii fəlakət baş vermiş zonalarda vəziyyətlə tanış olmuş, şagirdlər və müəllimlərlə görüşmüşdür.
Bölmənin digər xəbərləri
