Həkim-allerqoloq: Uşaqlarda daha çox süd və yumurtaya qarşı allergik reaksiyalar olur
Bakı, 11 iyun, AZƏRTAC
“Allergiya orqanizmin hər hansı maddəyə qarşı yüksək həssaslığın reaksiyasıdır. Bu maddələrə allergenlər deyilir. Bunlara qida, ağac, gül-çiçək tozcuğu, kimyəvi maddələr, heyvan tükü, rütubət aiddir”.
AZƏRTAC xəbər verir ki, bu fikirləri Səhiyyə Nazirliyinin rəsmi İnstaqram hesabında canlı yayımda nazirliyin Elmi-Tədqiqat Ağciyər Xəstəlikləri İnstitutunun həkim-allerqoloqu Nihulya Şamilova açıqlayıb.
Onun sözlərinə görə, əgər ailədə valideynlərdən birində allergik anamnez varsa, bunun uşağa keçmə ehtimalı 20-30, onların ikisində allergik anamnez varsa, uşağa keçmə ehtimalı 50-60 faizdir: “Valideynlərdən birində allergik xəstəliklərdən hansısa biri varsa, övladlarında allergik reaksiyalardan bir klinik əlamət görərsə, mütləq həkimə müraciət etməli, allergik müayinələrdən keçməli, təsdiq olunmuş allergendən uzaq durmaq lazımdır. Uşaqlarda daha çox qida allergenlərinə rast gəlinir. Bu da erkən uşaqlıq dövründə özünü ya allergik səpkilər və ya ishal, qəbzlik, köp şəklində göstərir. Uşaqlarda daha çox süd və yumurtaya qarşı allergik reaksiyalar olur”.
Həkim-allerqoloq qeyd edib ki, bundan əlavə uşaqda tez-tez asqırma, burun qaşıntısı, göz yaşarma, gözlərin sulanması, quru öskürək, təngnəfəslik və boğulma kimi əlamətlər müşahidə olunarsa, valideyn mütləq allerqoloqa müraciət edilməlidir: “Kliniki əlamətlərə uyğun uşaqda hansı allergik xəstəlik növü varsa, aşkar olunmalıdır. Bunlara allergik rinit, konyunktivit və enterit, bronxial astma kimi xəstəliklər aiddir. Allergik rinit zamanı uşaqlarda tez-tez burunçəkmə, burun axıntısı və qaşıntısı, asqırma kimi əlamətlər rast gəlinir. Allergik konyunktivit zamanı göz ətrafında Morqani ləkələri nəzərə çarpır, gözlərdə yaşarma, göz qaşınması kimi əlamətlər görünür. Çox zaman bu iki xəstəliyə birlikdə rast gəlinir. Vaxtında müalicə olunmasa, bronxial astma kimi xəstəliyə keçə bilər. Biz buna atopik yürüş deyirik, yəni atopik dermatit, atopik rinit və sonradan bronxial astma. Anamnez və allergik müayinələrə əsasən uşaqda hansı allergenə qarşı reaksiya varsa, tapılmalıdır”.
Həkim-allerqoloq bildirib ki, əgər allergendən uzaq durmaq mümkün deyilsə, bu zaman yaranmış kliniki əlamətlərə uyğun müalicə təyin olunmalıdır. Həmin müalicə həkim nəzarəti altında fasiləsiz aparılmalı və təyinata uyğun zaman dəyərləndirilməlidir.
Bölmənin digər xəbərləri
