“HƏRBİ QULLUQÇULARIN DÖVLƏT İCBARİ ŞƏXSİ SIĞORTASI HAQQINDA” QANUNA ƏLAVƏLƏR VƏ DƏYİŞİKLİKLƏR EDİLMİŞDİR
AZƏRTAC xəbər verir ki, Milli Məclis “Hərbi qulluqçuların dövlət icbari şəxsi sığortası haqqında” qanuna əlavələr və dəyişikliklər etmişdir. Bu dəyişikliklər hərbi qulluqçuların sosial vəziyyətinin yaxşılaşdırılmasına, onların həyat risqlərinin lazımınca qiymətləndirilməsinə xidmət edir. Əlavə və dəyişikliklərdə deyilir ki, hər bir hərbi qulluqçu qanunvericiliklə müəyyən edilmiş şərti maliyyə vahidinin on min misli məbləğində sığorta edilir. Hərbi qulluqçulara (onların ailələrinə) xidməti vəzifələrinin icrası zamanı baş verə biləcək bədbəxt hadisələrə görə ödənilən sığorta məbləği də artırılır. Qanunda deyilir ki, sığorta edilən hərbi qulluqçuya, hərbi xidmətdə (toplanışda) olduğu zaman həlak olduqda 100 faiz, xəsarət aldıqda, xəstələnmə nəticəsində xidmətdən buraxıldıqdan sonra üç il müddətinə öldükdə 100 faiz, xidmətdə olduğu zaman itkin düşdükdə 100 faiz, xidmətdə olduğu zaman xəsarət alması nəticəsində hərbi xidmətə yararsız hesab edildikdə 25 faiz, yüngül xəsarət alması ilə əlaqədar sıradankənar hərbi xidmətə yararlı hesab edildikdə isə sığorta məbləğinin 5 faizi miqdarında sığorta ödənilir.
Bölmənin digər xəbərləri
