ORDU
Hərbi xidmətə yeni çağırılan gənclərin hərbi hissələrə qəbulu
Bakı, 16 yanvar, AZƏRTAC
Bu gün Azərbaycanda bütün sahələrdə olduğu kimi, ordu quruculuğunda da aparılan islahatlar müsbət nəticəsini verib.
Müdafiə Nazirliyinin mətbuat xidmətindən AZƏRTAC-a bildiriblər ki, istər şəxsi heyətin döyüş hazırlığı, istərsə də ruh yüksəkliyinin artırılması və maddi-məişət şəraitinin yaxşılaşdırılması üçün bütün imkanlar yaradılıb.
Xidməti fəaliyyətilə yaxından tanış olduğumuz “N” saylı hərbi hissə də bunu bir daha sübut edir. Burada şəxsi heyət üçün hər cür şərait yaradılıb. Bu da xidmətə başlayan gənc əsgərlərin hərbi qulluqçu kimi yetişməsində xüsusi əhəmiyyət kəsb edir.
Hərbi hissəyə gətirilən çağırışçılar əvvəlcə burada qəbul edilir. Hərbidə ilk addımlarını atan gənclər bir qədər həyəcanlıdırlar. Buna baxmayaraq, hərbi hissə onlar üçün çox maraqlıdır.
Şəxsi heyətin sağlamlığı çox vacibdir. Xidmətə başlamazdan əvvəl çağırışçılar tibbi müayinəyə cəlb olunurlar. Çağırışçılar həkimlər tərəfindən müayinə edildikdən sonra bu barədə onların tibb kitabçalarında müvafiq qeydlər aparılır.
Ümumiyyətlə isə hərbi hissədə şəxsi heyətin vaxtaşırı tibbi müayinəsi üçün müasir tibbi avadanlıqla təchiz edilmiş məntəqə fəaliyyət göstərir.
Həkim müayinəsindən sonra çağırışçılar psixoloqlarla söhbətlərə cəlb olunurlar. Gənclərlə ilkin tanışlıq zamanı onların psixi sağlamlıqlarının qiymətləndirilməsinə, şəxsi keyfiyyətlərinin aşkarlanmasına, hərbi xidmət şəraitinə uyğunlaşdırılmasına xüsusi diqqət yetirilir.
Növbəti mərhələdə çağırışçıların qeydiyyatı və bölgüsü aparılır. Onlar şəxsi heyətin uçotu bölməsinə təqdim olunaraq adlı siyahılar əsasında yoxlanılır. Hərbi biletlərindəki məlumatlar çağırışçılarla dəqiqləşdirildikdən sonra müvafiq bölmələrə təyin olunurlar.
Daha sonra çağırışçıların saçları səliqəyə salınır. Növbəti mərhələdə gənc əsgərlər paltar və digər şəxsi əşyalarla təmin edilirlər. Artıq yuyunmaq üçün hamama yollanmaq olar.
Soyuq qış aylarında hərbi hissəni daim isti su və istilik sistemi ilə təmin etmək üçün müasir tələblərə uyğun qazanxana fəaliyyət göstərir. Burada quraşdırılmış suqızdırıcılar vasitəsilə şəxsi heyət sutkada 24 saat istiliklə təmin olunur. Bundan əlavə, hərbi hissənin camaşırxanasında quraşdırılan müasir paltaryuyan, quruducu maşınlar və yataq ağlarının ütülənməsi üçün qurğular şəxsi heyəti həftə ərzində təmiz paltar və yataq ağları ilə təmin edir.
Şənbə və bazar günləri şəxsi heyətin yuyunma günləridir. Gördüyümüz bu müasir hamamda şəxsi heyət rahatlıqla yuyunur, təmiz paltarla təmin olunur.
Hərbi hissəsinin ərazisində yerləşən yeməkxana böyüklüyü və səliqə-sahmanı ilə göz oxşayır. Hərbi hissəyə gətirilən ərzaq məhsulları müasir tələblərə cavab verən soyuducu və dondurucu kameralarda saxlanılır. Bu kameralarda ət, balıq, toyuq məhsulları, meyvə, tərəvəz və digər ərzaq ehtiyatı saxlanılır. Yeməkxananın mətbəxində müasir avadanlıq quraşdırılıb ki, bu da bütün növ yeməkləri hazırlamağa imkan verir. Burada əsas üstünlük milli yeməklərə verilir. Şəxsi heyət hər gün üç dəfə kalorili isti yeməklə təmin olunur.
Qadın aşpazların qayğı ilə hazırladıqları xörəklər ev yeməyindən heç nə ilə fərqlənmir.
Şəxsi heyətin fiziki hazırlığı ən vacib məsələlərdən biridir. Hərbi hissənin idman şəhərciyində əsgərlərimiz günün nizam tələblərinə uyğun olaraq hər gün səhər və axşam idman məşğələləri keçirlər.
Ordumuzun gücü dövlətimizin qürurudur. Azərbaycan Ordusunun ən ali məqsədi ərazi bütövlüyümüzü bərpa etmək, dövlətimizin gücünü, qüdrətini artırmaqdır. Azərbaycan Ordusu bu müqəddəs vəzifəni yerinə yetirməyə tam hazır və qadirdir.