Heydər Əliyevin xilaskarlıq missiyası Azərbaycanın müstəqil dövlət kimi yaşamasını təmin edib
Bakı, 2 oktyabr, AZƏRTAC
Azərbaycanın müasir tarixi 1993-cü il oktyabrın 3-nü dönüş nöqtəsi kimi xatırlayır. Həmin gün Ümummilli Lider Heydər Əliyev Azərbaycan Respublikasının Prezidenti seçilərək xalqın istəyi və iradəsi ilə ölkə rəhbərliyinə qayıtdı. Bu, yalnız bir seçki nəticəsi deyildi. Bu, Azərbaycan dövlətçiliyinin xilası, milli qurtuluş yolunun başlanğıcı, müstəqil dövlətimizin gələcək inkişafının təməli idi.
Bu fikirləri AZƏRTAC-a müsahibəsində Milli Məclisin deputatı Mehriban Vəliyeva deyib. O bildirib ki, 1991-ci ildə müstəqilliyini bərpa edən Azərbaycan ağır sınaqlardan keçib: “1991–1993-cü illər hərc-mərclik, özbaşınalıq, qeyri-peşəkar idarəçilik dövrü kimi tariximizdə qalmaqdadır. Dövlət institutları zəiflədilmiş, ölkənin suverenliyi təhlükə altına düşmüş, torpaqlarımız işğala məruz qalmışdı. Xalq yalnız bir çıxış yolu görürdü – bu, Heydər Əliyevin xilaskarlıq missiyası idi. Onun xalqın təkidli tələbi ilə hakimiyyətə qayıdışı Azərbaycan dövlətçiliyinin dağılmasının qarşısını aldı, müstəqilliyimizin qorunmasını təmin etdi. Heydər Əliyev dövlət idarəçiliyinə qayıdaraq bütün ömrünü Azərbaycanın gələcək inkişafına həsr etdi. O, Vətənə sədaqətli xidmətin, peşəkar siyasətin, müdrik liderliyin simvoluna çevrildi”.
Deputat Azərbaycan siyasətində Heydər Əliyev fenomeninin xüsusi yer tutduğunu söyləyib: “Onun dünya miqyasında qəbul edilən siyasi peşəkarlığı, müzakirə olunan məsələlərin mahiyyətini milli maraqlar kontekstində izah etmək bacarığı, dərin analitik yanaşmaları və natiqlik istedadı dövlət başçısı olaraq üstünlüklərinin əsas göstəriciləridir. Ümummilli Liderin dəyişməz siyasi kursu, azərbaycançılıq ideologiyası müasir dövlətçilik düşüncəsinin, milli-mənəvi dəyərlərin və ümumbəşəri prinsiplərin sintezindən ibarət idi. Heydər Əliyev siyasətdə planlı idarəetmənin, dəqiq strateji xəttin, iqtisadi inkişaf modelinin banisi oldu. Onun neft strategiyası Azərbaycanın dünya iqtisadi sisteminə inteqrasiyasını təmin etdi, ölkəmizi beynəlxalq aləmdə etibarlı tərəfdaş kimi tanıtdı. Məhz Ulu Öndərin təşəbbüsü ilə qəbul olunan 1995-ci il Konstitusiyası ölkəmizin demokratik inkişaf yolunu müəyyən etdi, hüquqi dövlət quruculuğu prosesinə start verdi. Cinayətkarlığa qarşı barışmaz mübarizə, iqtisadi islahatlar, sabitliyin bərqərar olunması dövlətin dayanıqlı inkişafını təmin etdi”.
Mehriban Vəliyeva bildirib ki, Heydər Əliyevin uğurlu xarici siyasəti Azərbaycanın beynəlxalq nüfuzunu artırdı: “O, beynəlxalq əməkdaşlıq əlaqələrini genişləndirdi, Azərbaycanın sülhpərvər siyasətini dünya ictimaiyyətinə çatdırdı, ölkəmizin mövqeyini möhkəmləndirdi. Ümummilli Lider Heydər Əliyevin dövlətçilik siyasəti bu gün də Azərbaycan üçün yol xəritəsi rolunu oynayır. Prezident İlham Əliyevin rəhbərliyi ilə həyata keçirilən siyasət də həmin sarsılmaz təməllər üzərində qurulub. Azərbaycanın güclənməsi, müstəqilliyimizin əbədiliyi, suverenliyimizin bərpası və xalqımızın firavan gələcəyi məhz Heydər Əliyevin qoyduğu ideoloji və siyasi bünövrədən qaynaqlanır. Prezident İlham Əliyev ata vəsiyyətini yerinə yetirərək işğal altında olan torpaqlarımızı azad etməklə Ulu Öndərimizin xalqımız üçün ən böyük arzusunu həyata keçirmiş oldu.
Nəticə etibarilə, 1993-cü il oktyabrın 3-ü yalnız siyasi tariximizin bir səhifəsi deyil, milli varlığımızı qoruyan, dövlətimizi gələcəyə daşıyan tarixi bir gündür. Heydər Əliyevin xilaskarlıq missiyası Azərbaycanın müstəqil dövlət kimi yaşamasını təmin etmiş, xalqımıza inam və nikbinlik bəxş edib”.
Bölmənin digər xəbərləri
