Heydər Əliyev ideyaları ilə tərbiyələnmiş gənclik
Bakı, 6 sentyabr, AZƏRTAC
Gənclik dünənlə bu gün arasında vəsilə yaradan nəsil olaraq tarixi proseslərin davamlılığını təmin edir. Ölkəmizin ictimai-siyasi, sosial-iqtisadi, elmi-mədəni həyatında önəmli rol oynayan, Vətənimizin müdafiəsində və ərazi bütövlüyümüzün bərpasında misilsiz hünər göstərən Azərbaycan gəncliyi bu günümüzün qürur mənbəyi, sabahımızın etibarlı sahibidir.
Hər bir xalqın bugünkü gəncliyi hansı amalla yaşayırsa onun gələcəyi də o yöndə qurulur. Bu baxımdan müasir Azərbaycan gəncliyi müstəqillik epoxasının yetirməsi olaraq Ümummilli Lider Heydər Əliyevin suverenlik, demokratiya və milli idealın gerçəkləşməsi siyasətinin hədəfləri ilə tərbiyələnib, həyata hazırlanıb. Bu gün Azərbaycan gəncliyinin inkişafında, özünü təsdiqində, şübhəsiz ki, Ulu Öndərin milli dövlətçilik ideologiyası səviyyəsinə qaldırdığı azərbaycançılıq prinsipləri məfkurəvi əsasdır.
Bu fikirləri AZƏRTAC-a açıqlamasında Milli Məclisin deputatı, Yeni Azərbaycan Partiyası İdarə Heyətinin üzvü Rəşad Mahmudov deyib.
O bildirib ki, istər sovet, istərsə də müstəqilliyin ilk onilliyində - 33 il Azərbaycanın tarixi taleyini müəyyən etmiş Ümummilli Liderin ölkəyə mükəmməl rəhbərliyi dönəmində gəncliyimizin fiziki cəhətdən sağlam, zehni baxımdan kamil, praktik yöndən bacarıqlı və təşəbbüskar nəsil kimi formalaşması üçün sistemli, kompleks tədbirlər həyata keçirilib. Bütövlükdə milli-mədəni intibah epoxası olmuş həmin illərin dövlət gənclər siyasəti Heydər Əliyevin adı ilə bağlıdır. Təhsili xalqın tarixi tərəqqisinin təkanverici qüvvəsi hesab edən Ulu Öndər yeni nəslin intellektual inkişafı və yüksək mütəxəssislər kimi hazırlanması üçün orta, peşə və ali məktəblərin fəaliyyətini ən yüksək səviyyəyə qaldırmaq üçün əsl fədakarlıq nümunəsi sərgiləyib.
Azərbaycan rəhbəri gənclərimizin keçmiş SSRİ-nin ən yaxşı ali məktəblərində kamillik məktəbi keçməsinin geniş şəbəkəsini təşkil edib. Bununla yanaşı, Heydər Əliyev milli hərb sənətini tənəzzüldən xilas etmək üçün məktəblilərin hərbi liseydə oxumasını, gənclərin zabit kimi hazırlanmasını da son dərəcə zəruri hesab edib.
Ulu Öndər bu məqsədlə Bakıda Cəmşid Naxçıvanski adına hərbi liseyin yaradılmasına, orta məktəb məzunlarının ali hərbi məktəblərdə təhsil almasına birbaşa özü rəhbərlik edib. Müstəqillik illərində Azərbaycana rəhbərliyi dövründə təhsilə daha böyük önəm verən unudulmaz Heydər Əliyev mütərəqqi ənənəsinə sadiq qalaraq məktəblərin milli ruhda qurulmasını gerçəkləşdirdi, eləcə də gənclərin dünyanın nüfuzlu ali məktəblərində oxumasına dövlət himayəsi göstərdi.
Böyük strateq yaxşı bilirdi ki, milli dövlətin inkişafında, suveren ölkənin tərəqqisində gənclərin yüksək səviyyədə iştirakını təmin etmək təxirəsalınmaz vəzifədir. Buna görə də Ümummilli Lider Heydər Əliyev dövlət gənclər siyasətini yenidən quraraq mükəmməl mexanizm halına gətirdi.
Ulu Öndərin gənclərlə mütəmadi görüşləri, onlarla bağlı vaxtında və düzgün verilmiş qərarlar, bacarıqlı, ictimai düşüncəli cavanların dövlət qulluğunda irəli çəkilməsi, əsas qüvvəsi gənclik olan idman, Olimpiya hərəkatının ölkəmizdə geniş vüsət alması sağlam, yurdsevər və güclü nəsil formalaşmasında önəmli tədbirlər oldu.
Azərbaycanın yenidən rəhbərliyi dönəmində gəncləri ölkəmizin, xalqımızın gələcəyi, ümidi adlandıran Ulu Öndər onlara qayğı göstərməyi dövlətin, eyni zamanda, hər bir vətəndaşın borcu hesab edirdi.
Böyük Heydər Əliyev dönə-dönə qeyd edirdi ki, XXI əsrdə Azərbaycanın inkişafının etibarlı təminatı gənclərin hansı arzularla yaşamasından və hansı bacarığın sahibi olmasından asılıdır. Bunun üçün onlar oxumalı, yüksək təhsil almalı, sağlam həyat tərzi keçirməlidirlər. Heydər Əliyev əminliklə qeyd edirdi ki, bizim gənclərimiz Azərbaycanın gələcəyini bizdən daha yaxşı təmin edəcəklər. Çünki bizim çox zəkalı, istedadlı gənclərimiz var. Gənclərin I Forumunun birinci ildönümü münasibətilə forum nümayəndələrinin bir qrupu ilə görüşdə Ulu Öndər milli ideologiyanın gənclərin inkişafında müstəsna roluna toxunaraq qeyd etdi ki, yeni nəsli müstəqilliyimizin əbədiliyi ideyasına sədaqət ruhunda tərbiyə etmək lazımdır.
Dahi Heydər Əliyev sağlam düşüncəli, vətənpərvər gənclərimizin fəaliyyətinə yüksək qiymət verərək bildirirdi ki, Azərbaycanın gələcəyi etibarlı əllərdədir. Ümummilli Liderin etimad göstərdiyi Azərbaycan gəncliyinin lideri Prezident İlham Əliyevin rəhbərliyi ilə Azərbaycan heç vaxt bugünkü kimi qüdrətli olmayıb. Heydər Əliyevin yaratdığı həmin gənclik öz lideri Prezident İlham Əliyevin ətrafında “dəmir yumruq” kimi birləşərək xalqımızın bir qərinəlik nisgilinə son qoydu, Qarabağı erməni vandallarından xilas etdi. Gəncliyin süngüsü ilə torpaqlarımız işğaldan azad olundu, Vətən bütövləşdi.
Şərəfli 44 günlük müharibədən sonra bütün dünya şahid oldu ki, Vətəni Azərbaycan gənci kimi sevmək və uğrunda ölmək çağdaş bəşəri örnəkdir. Dünyanın hərb tarixində misilsiz bir səhifə olan Şuşa döyüşlərində qəhrəman əsgərlərimizin cəsarətli, şərəfli savaş yolu həm də Azərbaycan gəncinin qüdrətinin dünyaya nümayişi oldu.
Deputat sonda qeyd edib ki, bu gün qalib Azərbaycan gəncliyinin səsi-sorağı dünyanın hər yerindən - şöhrətli ali təhsil ocaqlarından və elm mərkəzlərindən, nüfuzlu konfrans salonlarından, beynəlxalq idman arenalarından, aktual bəşəri debatlardan gəlir. Bu səs həm də xalqımızın əbədi öndəri Heydər Əliyevin ideya və əməllərinin, arzu-istəklərinin əks-sədasıdır. Xalqımızın milli sərvəti olan gənclərimiz Heydər Əliyevin yaratdığı möhtəşəm əsaslar üzərində həm ölkəmizdə, həm də dünyada özünü təsdiq etməyi bacarırlar. Qazanan isə bütövlükdə Heydər Əliyevin ən böyük əmanəti olan Azərbaycandır.
Bölmənin digər xəbərləri
