Heydər Əliyevin Azərbaycan rəhbərliyinə qayıdışı həyatın bütün sahələrində fundamental dəyişikliklərin əsasını qoydu
Bakı, 25 iyun, AZƏRTAC
Xalqımızın Ümummilli Lideri Heydər Əliyevin Azərbaycan rəhbərliyinə qayıdışı həyatın bütün sahələrində fundamental dəyişikliklərin əsasını qoydu. Heydər Əliyev islahatlarının vüsəti, əhatə dairəsi, ölkə həyatının ümumi mənzərəsinə təsir göstərmək imkanları yeni cəmiyyət yaradılması zərurətini qaçılmaz edirdi.
Bu fikirləri AZƏRTAC-a açıqlamasında Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev söyləyib.
O bildirib ki, “İqtisadiyyatı güclü olan dövlət hər şeyə qadirdir” prinsipinə əsaslanan Ulu Öndərin fəaliyyətinin ən mühüm, strateji əhəmiyyət daşıyan iqtiqamətlərindən biri bazar münasibətlərinə keçidin tələblərinə uyğun iqtisadi siyasəti reallaşdırmaq, ölkə iqtisadiyyatını böhrandan qurtararaq, inkişaf yoluna çıxarmaq idi. Onun prezidentliyi dövründə iqtisadiyyatın bütün sahələrində köklü islahatlar aparıldı və nəticədə iqtisadiyyatın dinamik inkişafı təmin edildi: “Bu sahələrdən biri də ölkədə bank-maliyyə sahəsinin formalaşdırılması, bu sektorun yeni iqtisadi münasibətlərə uyğunlaşdırılmasından ibarət idi. Ölkənin bank sektorunda sürətli inkişaf müşahidə olunan 1990-cı illərdə Azərbaycanda əsasən kənd təsərrüfatının maliyyələşməsi ilə məşğul olan Səhmdar Kommersiya Aqrar-Sənaye Bankı (hazırda “Aqrarkredit” QSC) fəaliyyət göstərirdi. Həmin dövrdə Səhmdar Kommersiya Aqrar-Sənaye Bankının İdarə Heyətinin sədri kimi təşəbbüslə çıxış etdim və Ulu Öndər Heydər Əliyevin xeyir-duası ilə 1995-ci ildə Türkiyənin ən böyük bankı “Ziraat” Bank ilə birgə bank yaradılması razılaşdırıldı.
“Sahibkarlığın inkişaf etdirilməsi, sərbəst iqtisadiyyata yol verilməsi, bazar iqtisadiyyatının yaradılması bizim strateji yolumuzdur”, - deyən Heydər Əliyev ölkənin gələcək iqtisadi inkişafının məhz özəl sektorla bağlı olduğunu vurğulayırdı. Qəbul edilmiş dövlət proqramlarının bu sahənin inkişafında xüsusi rolu oldu, kiçik və orta sahibkarlığın inkişafını iqtisadi siyasətin prioritet istiqamətlərindən birinə çevirdi”.
M.Musayev vurğulayıb ki, Ümummilli Liderin sahibkarlarla keçirilən görüşləri, üzləşdikləri problemlərin nədən ibarət olduğunu bilavasitə onların öz dilindən eşitməsi və bunların qısa müddət ərzində həlli üçün konkret tapşırıqlar, fərmanlar və sərəncamlar verməsi, dövlət proqramlarının qəbul edilməsi özəl sektorun təmsilçilərinə yüksək diqqətin təzahürüdür. Belə görüşlərdən biri də 2002-ci ilin aprelin 25-də xarici iş adamları ilə olub. Bu görüşlərdə sahibkarlığın inkişafı yolları araşdırılmış, bu inkişafa mane olan əngəllərin aradan qaldırılması üçün konkret tədbirlər müəyyənləşdirilmiş, növbəti illər üçün Azərbaycanda sahibkarlığın inkişafı ilə bağlı Dövlət Proqramları təsdiq olunmuşdur.
“Azərbaycan dövləti tərəfindən Prezident İlham Əliyevin rəhbərliyi ilə işğaldan azad olunmuş torpaqların sürətli bərpası istiqamətində hazırda böyük işlər görülür. İnsanların tezliklə öz yurd-yuvalarına qayıtması, bu torpaqlarda sahibkarlığın inkişaf etdirilməsi, yeni iş yerlərinin yaradılması, işğaldan azad edilmiş ərazilərimizdə həyatın yenidən canlanması üçün mühüm tədbirlər həyata keçirilir. Əminik ki, birgə səylərimiz nəticəsində tez biz zamanda Qarabağımızı yenidən dirçəldəcək, insanların öz doğma yurdlarına dönməsinə nail olacağıq. Bu sahədə dövlətlə özəl sektor arasında dialoqun, əməkdaşlığın olması da xüsusi əhəmiyyət daşıyır”, - deyə M.Musayev bildirib.
Bölmənin digər xəbərləri
