Hüquqsuz avtomobil idarə edən şəxsin narkotik aludəçisi olduğu müəyyən edilib
Bakı, 25 iyun, AZƏRTAC
Şirvan şəhər sakini Tahir Abdullayevin idarə etdiyi “Hyundai” markalı avtomobil Ekoloji nəzarət bölüyünün əməkdaşları tərəfindən saxlanılıb.
Bu barədə AZƏRTAC-a Baş Dövlət Yol Polisi İdarəsindən məlumat verilib.
Bildirilib ki, araşdırma zamanı T. Abdullayevin avtomobili sürücülük vəsiqəsi və etibarnamə olmadan idarə etdiyi aşkarlanıb.
Ünsiyyət zamanı hərəkətləri şübhə doğuran T. Abdullayev tibbi müayinəyə cəlb olunub və onun narkotik maddə qəbul etməsi üzə çıxıb. Barəsində müvafiq protokol tərtib edilərək məhkəməyə göndərilən T. Abdullayev 20 gün müddətinə inzibati qaydada həbs olunub.
Baş Dövlət Yol Polisi İdarəsi narkotik vasitələrin təsiri altında sükan arxasına əyləşərək digər hərəkət iştirakçılarının həyatına təhlükə yaradan şəxslərdən hüquqazidd əməllərə son qoymağı tələb edir və bu kimi hallara qarşı daha kəsərli tədbirlərin görüləcəyini bildirir.
Bölmənin digər xəbərləri
