Bakı, 2 oktyabr, AZƏRTAC

Oktyabrın 2-də Avropa İttifaqının maliyyələşdirdiyi və UNİSEF-in dəstəyi ilə Təhsil İnstitutu tərəfindən icra olunan “İcma qrupları vasitəsilə məktəbəqədər və ibtidai təhsilin yaxşılaşdırılması” layihəsinin təqdimat mərasimi keçirilib.

AZƏRTAC xəbər verir ki, tədbirin keçirilməsində məqsəd məktəbəqədər təhsilin əhəmiyyətini və bu sahədə ötən 1 il ərzində görülən işləri ictimaiyyətin diqqətinə çatdırmaqdır. Tədbirdən öncə iştirakçılar icma qruplarında tədris prosesi və istifadə edilən vəsaitlərlə tanış olublar.

Milli Məclisin deputatları və digər qonaqların iştirak etdikləri tədbirdə əvvəlcə layihə barədə videomaterial nümayiş etdirilib.

Tədbirdə çıxış edən Təhsil nazirinin müavini Məhəbbət Vəliyeva dövlət təhsil siyasətinin strateji istiqamətlərindən biri olan məktəbəqədər təhsilin əhəmiyyətindən və bu sahədə əldə edilmiş nailiyyətlərdən danışıb. O, erkən yaş dövründə öyrənilən hər bir bacarıq və vərdişin uşağın məktəbdə oxumasına, eləcə də sonrakı həyatı boyu necə öyrənməsinə böyük təsir göstərdiyini vurğulayıb. Qeyd edib ki, Azərbaycanda məktəbəqədər təhsil səviyyəsinin inkişafı istiqamətində mühüm addımlar atılır və son üç ildə 5 yaşlı uşaqların məktəbəqədər təhsilə cəlb olunması göstəricisi 24 faizdən 75 faizə yüksəlib.

Təhsil Nazirliyinin Təhsilin inkişafı proqramları şöbəsinin müdiri Emin Əmrullayev çıxışında layihənin əhəmiyyətindən danışıb. O bildirib ki, layihə çərçivəsində 10 rayonda 50 icma seçilib, hər icmada orta hesabla 20 nəfər 3 və 4 yaşlı uşaq layihəyə cəlb olunub.

Layihənin meneceri İlahə Rəsulova bildirib ki, əsas məqsəd icma əsaslı vətəndaş qrupları vasitəsilə məktəbəqədər təhsilin əhatəliliyini artırmaq və valideynlərin məktəbəqədər təhsil xidmətlərinin monitorinqində fəal iştirakını təmin etmək, şəffaflıq və hesabatlılığın, eləcə də məktəb-cəmiyyət münasibətlərinin gücləndirilməsinə nail olmaqdır. Layihə çərçivəsində mentorlar və icma nümayəndələri üçün təlimlər keçirilib, məktəbəqədər təhsillə bağlı kurikulum, iş dəftərləri və valideynlər üçün maarifləndirici vəsaitlər, uşaqların inkişaf dinamikasını göstərən qiymətləndirmə alətləri hazırlanıb, 250-yə yaxın valideyn üçün maarifləndirici seminarlar keçirilib. 2018-2019-cu tədris ilində 3-4 yaş olmaqla 1000 uşaq (542 oğlan və 478 qız) məşğələlərə qatılıb.

UNİSEF-in Azərbaycandakı nümayəndəsinin müavini Min Yuan icrasına başlanılan bu yeni təşəbbüs sayəsində ölkədə uşaqların məktəbəqədər təhsilə cəlb olunmasının əhəmiyyətini vurğulayıb. Min Yuan əlavə edib ki, UNİSEF hər zaman məktəb yaşına çatmamış uşaqlar üçün yeni kurikulum və tədris materiallarının işlənib hazırlanmasında, yeni metodologiyalar üzrə təlimlər keçirilməsində Təhsil Nazirliyinə dəstək göstərib.

Avropa İttifaqının Azərbaycandakı nümayəndəliyinin rəhbəri Kestutis Yankauskas isə deyib ki, ən azı birillik məktəbəqədər təhsilə cəlb edilmiş uşaqların ümumtəhsil məktəblərində müvəffəqiyyətlə oxuması üçün onlarda tələb olunan vacib bacarıqların inkişafı cəmiyyətə və ölkə iqtisadiyyatına töhfə verir.

Daha sonra icma qruplarında təhsil alan uşaqlar şeirlər və mahnılar səsləndiriblər.

Qeyd edək ki, 2018-2019-cu tədris ilində icma əsaslı məktəbəqədər təhsil qrupları Bakı şəhəri və 10 rayonda 100 icmada 2 mindən çox uşağı əhatə etməklə fəaliyyətə başlayıb. Cari tədris ilində isə bu qrupların sayının artırılaraq 300-ə, uşaqların isə 6000 nəfərə çatdırılması nəzərdə tutulur.