İki dəfə uğursuz oldu, üçüncü cəhddə arzuladığı universitetə qəbul aldı - Dövlət Proqramının qalibi
Bakı, 26 avqust, AZƏRTAC
Bəzən uğura gedən yol birbaşa olmur. Qarşıya qoyulan məqsədə çatmaq üçün bir neçə dəfə cəhd etmək, uğursuzluqlardan nəticə çıxarmaq və yoluna davam etmək lazım gəlir. Rafət Bayramovun xaricdə təhsil hekayəsi də məhz belə bir yolun nümunəsidir. İki dəfə uğursuzluqla üzləşsə də, o, məqsədindən dönməyib və üçüncü cəhdində arzusuna çatıb.
Rafət Bayramov 2022-ci ildə Bakı Mühəndislik Universitetinin kompüter elmləri ixtisasına 617 balla qəbul olunub. Universitet illərində kibertəhlükəsizlik sahəsinə yönəlib, bu istiqamətdə bilik və bacarıqlarını inkişaf etdirib və 2026-cı ildə bakalavriat təhsilini başa vurub. İndi isə qarşıda onun üçün yeni mərhələ dayanır. 2026-2027-ci tədris ili üzrə Dövlət Proqramının qalibi olan Rafət Bayramov Böyük Britaniyanın Mançester Universitetində kibertəhlükəsizlik ixtisası üzrə magistratura təhsili alacaq.
Dövlət Proqramının qalibi Rafət Bayramov AZƏRTAC-a müsahibəsində bildirib ki, texnologiyaya marağı hələ uşaqlıq illərindən başlayıb: “İnformasiya texnologiyaları və kompüter sahəsinə yönəlməyimdə əsas səbəb kiçik yaşlarımdan texnoloji cihazlara olan marağım idi. Bu, bir qədər şablon səslənə bilər, amma məndə vəziyyət bir qədər fərqli idi. Mən cihazlardan sadəcə istifadə etmirdim, onların işləmə prinsiplərini anlamağa çalışırdım. Tənzimləmələrini dəyişir, cihazın necə reaksiya verdiyini müşahidə edirdim. Təbii ki, çox vaxt sıradan çıxarırdım və mütəxəssis çağırıb bərpa etdirmək lazım olurdu.
Xaricdə təhsil almaq arzusu ilə hələ orta məktəb illərindən xəyallar qururdum. Dərsliklərdə, televiziyada, internetdə gördüyümüz nüfuzlu ali təhsil müəssisələrində təhsil alan azərbaycanlı gəncləri gördükcə bir gün onların sırasında ola biləcəyim düşüncəsi məni daim motivasiya edirdi. Özümü qlobal səviyyədə inkişaf etdirmək, dünyanın ən yaxşı universitetlərində müasir İT təhsili almaq istəyirdim. Əlbəttə, xaricdə təhsil öz möhtəşəmliyi ilə birlikdə böyük maliyyə yükü də gətirir. Buna görə universitetlərdən qəbul məktubları almaqla bərabər maliyyə azadlığı verəcək təqaüd tapmaq da zəruri idi. Həm bu baxımdan, həm də Dövlət Proqramının gənclərin xaricdə təhsil alaraq ölkəmizə töhfə verməsi ideyası mənim məqsədlərimlə üst-üstə düşürdü. Universitetlərə qəbul olunmaq və Dövlət Proqramına müraciət etmək üçün ciddi hazırlıq lazım idi. Bu prosesdə heç kimdən yardım almadan, təkbaşına irəliləmişəm. Ən böyük məqsədim valideynlərimə sonda böyük sürpriz etmək idi. Çünki xaricdə təhsil almaq, xüsusən də ölkəmizin ən nüfuzlu proqramlarından biri çərçivəsində bunu etmək ən azı mənim qədər onların da xəyalı idi. Buna görə bütün hazırlıq və müraciət proseslərini bir növ gizli davam etdirdim.
İlk olaraq həm xarici ali təhsil müəssisələrinin, həm də Dövlət Proqramının əsas tələbi olan beynəlxalq dil sertifikatını aldım. Bakalavriat təhsilimi ingilis dilində almağım və valideynlərimdən birinin xarici dil müəllimi olması mənim üçün böyük üstünlük idi. Qısamüddətli fərdi hazırlıqdan sonra tələb olunan C1 səviyyəsində beynəlxalq dil sertifikatını aldım və universitetlərə müraciət etdim. Daha sonra Dövlət Proqramına müraciət üçün tələb olunan sənədləri hazırlayaraq sənəd qəbulu elan olunan gün müraciət etdim. Dünyanın müxtəlif ölkələrindən 8 fərqli universitetdən qəbul məktubu almışdım. Səmimi desəm, bu universitetlərdən növbə ilə qəbul xəbərləri gələndə müəyyən qədər sevinsəm də, onlar məni çox da həyəcanlandırmırdı. Çünki əsl xəbər gözlədiyim universitet cavabını ən sona saxlamışdı.
Nəhayət, illərdir xəyalını qurduğum, bu yola ilk başladığım andan orada təhsil almaq fikrinin məni həyəcanlandırdığı və motivasiya etdiyi Mançester Universitetindən müsbət cavab gəldi. Bu xəbəri öyrənəndə o vaxta qədər qurduğum xəyallar ikiqat artdı və həqiqətən, bunun mənim əsl arzum olduğunu anladım”.
Mançester Universitetini seçməsində ali məktəbin beynəlxalq nüfuzu ilə yanaşı, təhsil alacağı istiqamət üzrə güclü akademik struktura və peşəkar müəllim heyətinə malik olması da mühüm rol oynayıb. Universitetin tədris proqramlarının real iş mühitinin tələblərinə uyğunlaşdırılması isə Rafətin peşəkar hədəfləri ilə üst-üstə düşür.
Kibertəhlükəsizlik istiqamətinə marağı da məhz bakalavriat təhsili dövründə daha da möhkəmlənib: “Bakalavr təhsilində illər keçdikcə anladım ki, rəqəmsal infrastrukturların təhlükəsizliyini təmin etmək ən azı onları qurmaq və inkişaf etdirmək qədər önəmlidir. Ölkəmizin günü-gündən sürətlə inkişaf edən rəqəmsal dünyasının mühafizəsi də ciddi məsuliyyət və yaxşı yetişmiş peşəkarlar tələb edir. Buna görə də bu sahədə mütəxəssisl və savadlı bir kadr kimi formalaşaraq ölkəmin inkişafına və təhlükəsizliyinə töhfə verməyi özümə hədəf seçdim. Orada yiyələnəcəyim bilik və bacarıqlardan ölkəmdə maksimum istifadə etmək, beynəlxalq standartların ölkəmizdə ən operativ şəkildə tətbiqində iştirak etmək istəyirəm. Durmadan rəqəmsallaşan infrastrukturların, istər dövlət sektorunda, istər özəl, istərsə də bank sektorundakı fəaliyyətini sarsılmaz hala gətirmək ən böyük hədəflərimdən biridir”.
Onun xaricdə təhsil yolunda qazandığı ən mühüm təcrübələrdən biri isə uğursuzluğa münasibəti olub: “Motivasiya önəmlidir, amma intizam və əzmkarlıq ondan qat-qat önəmlidir. Çünki bu dövr enişli-yoxuşludur və motivasiyamızı hər zaman qoruyub saxlaya bilmərik. Motivasiya keçici, intizam və əzmkarlıq isə qalıcıdır.
Mən özüm də xaricdə təhsil almaq yolunda iki dəfə uğursuz oldum və bu, mənim üçün dayanmaq səbəbi olmadı. Nəhayət, üçüncü cəhdimdə uğur qazandım. Üstəlik, bu uğur əvvəl əldə etməyə yaxın olduğum nəticələrdən qat-qat daha yaxşı oldu. Əminliklə deyə bilərəm ki, bu cəhdim də uğursuz olsaydı, növbəti dəfə yenə cəhd edəcəkdim. Gənclərimiz qarşılarına hədəf qoysunlar və o hədəfə gedən yolda heç bir maneəyə məhəl qoymadan irəliləsinlər. Uğursuzluqdan heç vaxt məyus olmasınlar, əksinə, ondan dərs çıxarıb daha güclü şəkildə bir daha cəhd etsinlər. Dövlət Proqramına müraciət etmək istəyən gənclərimiz çox çalışsınlar, maksimum səy göstərsinlər və həm özlərinin şəxsi inkişafı, həm də ölkəmizin parlaq gələcəyinin formalaşdırılması yolunda dövlətimiz tərəfindən yaradılan bu imkanlardan faydalansınlar”.
Müxbir - Nərmin Muradzadə
Bölmənin digər xəbərləri
