İki mindən çox namizəd məktəb direktoru olmaq üçün müraciət edib
Bakı, 2 oktyabr, AZƏRTAC
Sentyabrın 28-dən start verilən direktorların işə qəbulu üzrə müsabiqədə iştirak üçün 2508 namizəd elektron qeydiyyatdan keçib, 1648 namizəd müsabiqədə iştirakını təsdiq edib.
Təhsil Nazirliyindən AZƏRTAC-a bildirilib ki, müsabiqədə iştirak etmək istəyən namizədlər oktyabrın 5-i saat 23:59-dək miq.edu.az/direktorlar linkinə daxil olaraq qeydiyyatdan keçə bilərlər.
Müsabiqəyə elektron qeydiyyat zamanı hər hansı çətinliklə qarşılaşan şəxslər Təhsil Nazirliyinin İnsan resursları şöbəsinin +99470 248 19 92 mobil nömrəsinə zəng edərək bu barədə məlumat verə bilərlər. Həmin şəxslərin müsabiqə üzrə elektron qeydiyyatı İnsan resursları şöbəsi tərəfindən həyata keçiriləcək və məlumatları araşdırıldıqdan sonra onların direktor vəzifəsinə işə qəbul üzrə müsabiqədə iştirakı təmin olunacaq.
Qeyd edək ki, müsabiqə dörd mərhələdən (elektron sənəd qəbulu, test imtahanı, müsahibə və vakansiyalara yerləşdirilmə) ibarətdir. Direktorların işə qəbulu imtahanları ənənəvi olaraq, Bakı şəhərində deyil, ölkənin müxtəlif şəhər və rayonlarında yaradılan imtahan mərkəzlərində karantin rejiminin müvafiq tələblərinə əməl edilməklə təşkil ediləcək. Hər bir imtahan mərkəzində imtahanların təşkilinə cəlb olunan bütün əməkdaşlar COVID-19 testindən keçiriləcək. İmtahan mərkəzlərinin sanitar-epidemioloji tələblər çərçivəsində dezinfeksiya edilməsi təmin olunacaq.
Bölmənin digər xəbərləri
