İkinci Bakı Elm Olimpiadasının final mərhələsinin ilk turu keçirilib
Bakı, 20 aprel, AZƏRTAC
Ümummilli Lider Heydər Əliyevin 100 illik yubileyinə həsr olunmuş II Bakı Elm Olimpiadasının final mərhələsinin nəzəri hissəsi keçirilib.
Bu barədə AZƏRTAC-a Bakı Şəhəri üzrə Təhsil İdarəsindən (BŞTİ) məlumat verilib. Bildirilib ki, 8-ci və 9-cu sinif şagirdləri arasında keçirilən olimpiadanın final mərhələsinin nəzəri hissəsi 276 nömrəli tam orta məktəbdə təşkil olunub.
Olimpiadanın final mərhələsinin ilk turunda şagirdlər 3 saat ərzində hər fənn üzrə 5 qapalı və 1 açıq tipli (nəzəri) tapşırığı (ümumilikdə 15 qapalı və 3 açıq tipli (nəzəri) tapşırıq) cavablandırıblar.
Aprelin 26-da Bakı Ali Neft Məktəbində keçiriləcək final mərhələsinin II turunda isə məktəblilər 3 saat ərzində hər fənn üzrə 1 təcrübə işini (ümumilikdə 3 təcrübə işi) yerinə yetirəcəklər.
Final mərhələsində hər bir qapalı tipli tapşırıq 2 bal olmaqla, ümumilikdə 30 balla, açıq tipli tapşırıqlar da 30 balla qiymətləndiriləcək. Təcrübə işinin qiymətləndirilməsi isə ümumilikdə 40 ballıq sistemlə aparılacaq. Qaliblər Təşkilat komitəsi tərəfindən təyin olunmuş mütəxəssislərdən ibarət Ekspert qrupu tərəfindən müəyyənləşdiriləcək.
Qaliblərə BŞTİ tərəfindən diplom, medal və hədiyyələr təqdim ediləcək. Həmçinin final mərhələsinə keçən komandalar arasından ən yüksək bal toplayan komanda üzvləri diplomla təltif olunacaqlar.
Qeyd edək ki, olimpiadanın I mərhələsində ən yüksək nəticə göstərən 24 komanda final mərhələsində iştirak edib. BŞTİ və Bakı Ali Neft Məktəbinin birgə təşkilatçılığı ilə keçirilən olimpiadanın əsas məqsədi şagirdlərin təbiət elmlərinə (fizika, kimya, biologiya) olan marağını daha da artırmaq, bu sahədə nəzəri-təcrübi biliklərini təkmilləşdirmək, onların praktik və yaradıcılıq bacarıqlarının inkişaf etdirilməsinə şərait yaratmaq, istedadlı şagirdləri aşkara çıxarmaqdan ibarətdir.
Bölmənin digər xəbərləri
