İNDONEZİYADA 31 MART – AZƏRBAYCANLILARIN SOYQIRIMI GÜNÜNƏ HƏSR OLUNMUŞ TƏDBİR KEÇİRİLMİŞDİR
Bakı, 31 mart (AZƏRTAC). Azərbaycanın İndoneziyadakı səfirliyi Kharizma Bangsa indoneziya-türk məktəbində 31 mart - Azərbaycanlıların soyqırımı gününə həsr olunmuş tədbir keçirmişdir.
Əvvəlcə soyqırımı qurbanlarının xatirəsi bir dəqiqəlik sükutla yad edilmişdir.
Səfirlikdən bildirmişlər ki, Kharizma Bangsa və Cakartada fəaliyyət göstərən digər indoneziya-türk məktəbi Pribadinin müəllim və şagird heyətinin iştirak etdiyi tədbirdə çıxış edən səfirliyin əməkdaşları ümummilli lider Heydər Əliyevin Fərmanına əsasən 1998-ci ildən etibarən hər il ölkəmizdə 31 martın Azərbaycanlıların soyqırımı günü kimi dövlət səviyyəsində qeyd edildiyini diqqətə çatdırmış, tədbir iştirakçılarına erməni millətçiləri və terrorçuların son iki əsrdə xalqımıza qarşı həyata keçirdikləri soyqırımı siyasəti barədə məlumat vermişlər. Ermənilərin 1905-1907-ci, 1918-ci və 1988-1993-cü illərdə Azərbaycan xalqına qarşı törətdikləri ağlasığmaz cinayətlər toplantı iştirakçılarının diqqətinə çatdırılmışdır.
Minlərlə azərbaycanlını soyqırımına məruz qoymuş ermənilərin Osmanlı imperiyası tərəfindən “soyqırımı”na məruz qalmaları barədə əsassız iddialarına qarşı mübarizə aparılmasında, ermənilərin yalan və iftiraları barədə həqiqətlərin dünya ictimaiyyətinə çatdırılmasında xarici ölkələrdə yaşayan Azərbaycan və Türkiyə vətəndaşlarının birgə fəaliyyətinin vacibliyi vurğulanmışdır.
Sonda səfirliyin ingilis və bahasa indoneziya dillərində nəşr etdirdiyi “Ermənistan-Azərbaycan münaqişəsi” kitabları, ölkəmizin tarixi, mədəniyyəti və turizm imkanlarını əks etdirən digər kitablar və DVD-lər məktəblərin kitabxanalarına hədiyyə edilmişdir.
Bölmənin digər xəbərləri
