İNDONEZİYADA XOCALI FACİƏSİ QURBANLARININ XATİRƏSİ ANILMIŞDIR
Bakı, 19 fevral (AZƏRTAC). Azərbaycanın İndoneziya və eyni zamanda Filippindəki səfirliyi tərəfindən Cakartanın “Mənhəttən” hotelində Xocalı faciəsinin 17-ci ildönümü ilə əlaqədar tədbir keçirilmişdir.
Tədbirdə səfir İbrahim Hacıyev Ermənistan-Azərbaycan, Dağlıq Qarabağ münaqişəsi barədə ətraflı məlumat vermiş, hərbi təcavüz nəticəsində torpaqlarımızın 20 faizinin işğal olunduğunu, 1 milyondan artıq soydaşımızın qaçqın və məcburi köçkünə çevrildiyini, Azərbaycan rəhbərliyinin sülh səylərini, Ermənistan tərəfinin destruktiv mövqeyini diqqətə çatdırmışdır.
Diplomat 17 il əvvəl - 1992-ci il fevralın 25-dən 26-na keçən gecə erməni hərbi birləşmələri tərəfindən azərbaycanlılara qarşı Xocalı şəhərində törədilmiş misli görünməmiş soyqırımının bəşəriyyət tarixində ağır cinayətlərdən biri olduğunu vurğulamışdır.
İ.Hacıyev həmin hadisələr zamanı erməni millətçilərinin vəhşiliyinin qurbanı olmuş günahsız insanların əziz xatirəsinin hər il Azərbaycanda və digər ölkələrdə ehtiramla yad edildiyini diqqətə çatdırmışdır.
Səfir tədbir iştirakçılarına Azərbaycanın müasir həyatı, inkişafı, dünyada artan nüfuzu, regionda, Avropada, beynəlxalq və regional layihələrdə aparıcı rolu barədə məlumat vermişdir.
Heydər Əliyev Fondunun Xocalı faciəsi ilə bağlı nəşr etdirdiyi materiallar tədbir iştirakçılarına paylanmışdır.
Tədbirdə Pakistanın, Səudiyyə Ərəbistanının, Somalinin, Türkiyənin, Birləşmiş Ərəb Əmirliklərinin səfirləri, İndoneziyanın Nümayəndələr Palatasının üzvü Musa İxvanşah, işgüzar dairələrin, KİV-in nümayəndələri iştirak etmişlər.
Bölmənin digər xəbərləri
