İngilis dili müəllimi: “Ömürlük peşə” anlayışı artıq keçmişdə qalan yanaşmadır
Bakı,11 sentyabr, AZƏRTAC
Müasir dövrdə peşə seçimi mühüm məsələlərdən biri olaraq qalır. Lakin sürətlə dəyişən əmək bazarı və texnologiyaların inkişafı “ömürlük peşə” anlayışına yanaşmanı da dəyişir. İnsan seçdiyi peşədən asılı olmayaraq daim özünü inkişaf etdirməli, yenilikləri izləməli və dəyişən tələblərə uyğunlaşmalıdır.
Bu fikirləri AZƏRTAC-a açıqlamasında 20 nömrəli məktəb-liseydə çalışan ingilis dili müəllimi Gülbahar Quliyeva bildirib. Onun sözlərinə görə, müasir dünyada yalnız mövcud biliklərlə kifayətlənmək mümkün deyil. Hər bir mütəxəssis öz peşəsi üzrə baş verən yenilikləri izləməli, yeni bilik və bacarıqlar əldə etməli, onları praktikada tətbiq etməlidir.
Gülbahar Quliyeva qeyd edib ki, şagirdlərin gələcəyin sürətlə dəyişən əmək bazarına hazırlanmasında ingilis dilinin xüsusi rolu var. Onun fikrincə, seçilən peşədən asılı olmayaraq, gələcəkdə ingilis dilinə ehtiyac daha da artacaq. Çünki mütəxəssislər öz sahələri üzrə beynəlxalq təcrübəni öyrənmək, yeni məlumatlar əldə etmək və peşəkar inkişaflarını davam etdirmək üçün geniş şəkildə ingilis dilindən istifadə edirlər. İngilis dili insanlara yalnız beynəlxalq ünsiyyət qurmaq imkanı vermir. Eyni zamanda, bu dil vasitəsilə beynəlxalq mənbələrə çıxış əldə etmək, yeni biliklər qazanmaq və müxtəlif peşə sahələri üzrə dünyadakı yenilikləri izləmək mümkündür. O bildirib ki, dil öyrənmə prosesində şagirdlərin qarşılaşdığı əsas çətinliklərdən biri biliklərini ünsiyyət zamanı tətbiq etməkdən çəkinmələridir. Belə hallarda səhv etmək qorxusu və ətrafdakıların fikrindən narahatlıq şagirdin özünəinamına mənfi təsir göstərir.
Müəllimin sözlərinə görə, bu problemin aradan qaldırılması üçün şagirdlər dərs prosesində mümkün qədər çox ünsiyyətə cəlb edilməli, onlara səhv etməyin dil öyrənmənin təbii hissəsi olduğu izah olunmalıdır. Müəllimin də səhv edə biləcəyini göstərməsi şagirdlərdə daha rahat və sərbəst ünsiyyət mühiti yaradır. Bu isə onların özünəinamının artmasına və ingilis dilində daha fəal danışmasına şərait yaradır. Gülbahar Quliyeva məktəbdə həm ingilis dilinin, həm də Azərbaycan dilinin düzgün və zəngin mənimsənilməsinin vacibliyinə də diqqət çəkib. O hesab edir ki, şagirdin ana dilini yaxşı bilməsi xarici dilin öyrənilməsini də asanlaşdırır. Şagird ana dilində müəyyən qrammatik və dil qaydalarını bilmədikdə həmin qaydaların xarici dildə izahını anlamaqda da çətinlik çəkə bilər.
“Tədris prosesində bununla bağlı müəyyən çətinliklərlə qarşılaşırıq. Bəzən xarici dildə tədris olunan qrammatik qayda ana dilində daha yuxarı siniflərdə öyrədilir. Şagird həmin mövzunu ana dilində hələ mənimsəmədiyi üçün xarici dildə də başa düşməkdə çətinlik çəkir. Bu baxımdan dərsliklərin hazırlanması zamanı fənlərarası əlaqələrin və mövzuların tədris ardıcıllığının nəzərə alınması mühüm əhəmiyyət daşıyır. Fənlər üzrə dərsliklərin bir-biri ilə əlaqəli və ardıcıl hazırlanması şagirdlərin bilikləri daha sistemli şəkildə mənimsəməsinə və müxtəlif fənlər arasında əlaqə yaratmasına imkan verə bilər”, - deyə müsahibimiz qeyd edib. O bildirib ki, müasir məktəbin əsas məqsədlərindən biri şagirdləri yalnız konkret biliklərlə təmin etmək deyil, həm də onları daim öyrənən, dəyişikliklərə uyğunlaşan və gələcəyin əmək bazarının tələblərinə cavab verən fərdlər kimi yetişdirməkdir.
Müxbir - Tünzalə Arazlı
Bölmənin digər xəbərləri
