Bakı, 15 dekabr, AZƏRTAC 

Dekabrın 15-də Birləşmiş Millətlər Təşkilatının İnkişaf Proqramı (BMTİP), Ekologiya və Təbii Sərvətlər Nazirliyi, Təhsil Nazirliyi, Təhsil Nazirliyi Respublika Uşaq-Gənclər İnkişaf Mərkəzi (RUGİM), “EkoSfera” SEM-in birgə təşkilatçılığı ilə “BMT-nin İqlim dəyişmələri üzrə Çərçivə konvensiyasına Azərbaycanın Dördüncü Milli Məlumatının hazırlanmasına texniki yardım” layihəsi çərçivəsində onlayn platformada “Su ehtiyatlarından səmərəli istifadə” mövzusunda vebinar, “İqlim dəyişmələri və əhalinin sağlamlığı” onlayn sosial vloq müsabiqəsi və “Mavi səma üçün təmiz hava” fotoşəkil müsabiqəsinin qaliblərinin mükafatlandırma mərasimi keçirilib. Tədbir 15 dekabr BMT-nın Ətraf Mühitin Mühafizəsi Agentliyinin (UNEP) Yaradılması Günü ilə əlaqədar təşkil olunub.

AZƏRTAC-ın verdiyi xəbərə görə, tədbirdə çıxış edən təhsil nazirinin müavini Firudin Qurbanov bildirib ki, “BMT-nin İqlim dəyişmələri üzrə Çərçivə konvensiyasına Azərbaycanın Dördüncü Milli Məlumatının hazırlanmasına texniki yardım” layihəsi çərçivəsində aprelin 25-dən sentyabrın 30-dək Təhsil Nazirliyi Respublika Uşaq-Gənclər İnkişaf Mərkəzinin təşkilatçılığı ilə “İqlim dəyişmələri və əhalinin sağlamlığı” onlayn sosial vloq müsabiqəsi və iyulun 18-dən sentyabrın 12-dək “Su ehtiyatlarından səmərəli istifadə” mövzusunda məktəblilər və müəllimlər üçün onlayn platformada 10 vebinar proqramı keçirilib. Bununla yanaşı, ölkəmizdə həvəskar və peşəkar fotoqraflar arasında 7 sentyabr - Beynəlxalq “Mavi Səma üçün Təmiz Hava” gününə həsr olunan fotoşəkil müsabiqəsi təşkil olunub.

Nazir müavini, həmçinin deyib: “İnsanlar üçün ən önəmli nemət sağlamlıqdır. Tədqiqatlara görə, insan sağlamlığı 20 faiz ətraf mühitdən asılıdır. Ölkəmizdə ekoloji vəziyyətin yaxşılaşdırılması məqsədilə genişmiqyaslı tədbirlər keçirilir, yaşıllaşdırma işləri aparılır. Uşaq və gənclərin ekoloji tədbirlərə qoşulması, ətraf mühitin mühafizəsi, tullantıların utilizasiyası və s. mövzularda əlavə biliklərə yiyələnməsi xüsusi əhəmiyyət kəsb edir. Bu baxımdan məlumatlandırıcı onlayn vebinarlar, müsabiqələrin keçirilməsi vacibdir. Ölkəmizdə ətraf mühitin qorunmasında gənclərin daha aktiv iştirak edəcəyinə inanıram”.

Ekologiya və təbii sərvətlər nazirinin müavini Vüqar Kərimov 44 gün davam edən Vətən müharibəsində rəşadətli ordumuzun Ali Baş Komandan, Prezident İlham Əliyevin rəhbərliyi ilə qazandığı qələbə münasibətilə hər kəsi təbrik edib. O, erməni vandallarının həmin ərazilərdə nəinki infrastruktur və tikililəri dağıtdığını, həmçinin ekoloji terror törətdiyini qeyd edib: “Erməni terrorçuları qadağan olunmuş fosforlu silahlardan istifadə edib, Topxana meşəsini yandırıb, şərq çinarlarının qorunduğu Bəsitçay qoruğunun 50 faizdən çoxunu məhv ediblər. Həmçinin Qaragöl, Laçın, Qubadlı, Arazboyu, Daşaltı yasaqlıqlarında bütün qorunan və qorunma altında flora və fauna növləri məhv edilib. Su mənbələrini ya özlərinə sərf edən istiqamətdə istifadə ediblər, ya da ciddi çirkləndiriblər. Həmin ərazilərin bərpası üçün görüləcək işlər çoxdur”.

Nazir müavini müsabiqə qaliblərini təbrik edib, bütün iştirakçılara uğurlar arzulayıb.

Birləşmiş Millətlər Təşkilatının İnkişaf Proqramının rezident nümayəndəsinin müavini Çaru Bist dünyada təbii fəlakətlərin geniş yayıldığını və bunun ciddi narahatlıq doğurduğunu bildirib: “Əslində baş verənlər gözlənilən idi, çünki alimlər bununla bağlı bir neçə dəfə xəbərdarlıq etmişdilər. Hava, torpaq və suyun çirklənməsi öz təsirini göstərir. Biz bəşəriyyət olaraq öz yanaşmalarımızı dəyişməliyik. Yer kürəsinə ziyan vuran inkişaf və tərəqqi deyil. Hər birimiz ətraf mühitin mühafizəsində müəyyən rola malikik və öz töhfələrimizi verə bilərik.

Tədqiqatlara görə, əhalinin 80 faizi ətraf mühitin qorunmasını vacib sayır, lakin 50 faizdən azı bunun üçün nəyəsə cəhd edir. Şadam ki, Azərbaycanda gənclər də ekologiyaya dair fəaliyyət göstərir, həyata keçirdikləri tədbirlərlə böyüklərə nümunə olur və cəmiyyətə mesajlarını çatdırırlar. Ümid edirəm ki, həmin çağırışlar nəticə verəcək. Biz öz səylərimizi birləşdirəcəyimiz halda nəyəsə nail ola bilərik”.

Sonra çıxış edən Respublika Uşaq-Gənclər İnkişaf Mərkəzinin direktoru Firuza Sultanzadə keçirilən müsabiqələr və vebinar haqqında məlumat verib: “Uşaq və gənclər arasında “İqlim dəyişmələri və əhalinin sağlamlığı” onlayn sosial vloq müsabiqəsinin məqsədi məktəblilərin ekoloji maarifləndirilməsini genişləndirmək, onların ətraf mühitin qorunmasında fəal iştirakını təmin etmək, onlara ekoloji tərbiyə və mədəniyyətin aşılanması, ictimaiyyətin diqqətini iqlim dəyişikliyi və BMT-nin 17 dayanıqlı inkişaf məqsədinə çəkməkdən ibarətdir. “İqlim dəyişmələri və əhalinin sağlamlığı” onlayn sosial vloq müsabiqəsində Bakı şəhəri və respublikamızın regionlarından 3 yaş qrupu - 8 - 11, 12 - 15, 16 - 19 yaş qrupları üzrə Təhsil Nazirliyinin tabeliyində fəaliyyət göstərən ümumtəhsil müəssisələri və Uşaq-Gənclər İnkişaf Mərkəzlərinin dərnək üzvləri və ekoklub üzvləri fərdi və ya 7 nəfərdən artıq olmayan qrup şəklində 1705 iştirakçı müraciət edib. Ümumilikdə, əsasnamədə qeyd olunan texniki tələbələrə cavab verən 250 video vloq qəbul olunub. Təqdim olunan videovloqlar üzrə 1705 iştirakçı tərəfindən göndərilən 250 videovloq arasından 11-i münsiflər heyəti tərəfindən seçilib və hər yaş kateqoriyasında I, II, III yerlər üzrə qiymətləndirilməsi aparılıb. Qaliblər arasından münsiflər heyəti tərəfindən seçilmiş bir iştirakçı “Qran Pri”yə layiq görülüb.

Proqram müddətində BMT, Avropa İttifaqı və Ekologiya və Təbii Sərvətlər Nazirliyi və ekoloji könüllülərlə birgə Xəzərin sahilinin tullantılardan təmizlənməsi istiqamətində 3 aksiya keçirilib. “Su ehtiyatlarından səmərəli istifadə” proqramı çərçivəsində məktəblilər üçün su problemləri haqqında videoçarxlar və mövzuya uyğun esse müsabiqələri keçirilib, təqdim olunan 50-dən çox işin içində 20 qalib seçilib.

Birləşmiş Millətlər Təşkilatının Baş Məclisinin ötən il təsis etdiyi “Mavi Səma üçün Təmiz Hava” gününə həsr olunan “Mavi səma üçün təmiz hava” fotoşəkil müsabiqəsinin məqsədi yaradıcı insanların köməyi ilə geniş auditoriyanın diqqətinin təmiz texnologiyalara və alternativ enerji mənbələrinə keçidə cəlb edilməsi, Azərbaycan təbiətinə humanist rəftarın formalaşdırılması, ekoloji tərbiyə və mədəniyyətin aşılanmasıdır. Həvəskar və peşəkar fotoqraflar arasında “Mavi səma üçün təmiz hava” fotoşəkil müsabiqəsi regionlardan böyük marağa səbəb olub. Müsabiqəyə ümumilikdə iki nominasiya üzrə 72 fotoşəkil təqdim olunub, həvəskar və peşəkar nominasiyaları üzrə hər birindən 3 qalib seçilib.

Daha sonra müsabiqələrdə qalib gələn məktəblilərin adları açıqlanıb. Qaliblər diplom və qiymətli hədiyyələrlə, digər bütün iştirakçılar isə sertifikatlarla təltif olunub.

COVID-19 pandemiyasının ölkəmizdə yarada biləcəyi təhlükənin qarşısının alınması məqsədilə elan edilmiş karantin rejimi ilə əlaqədar qaliblərin mükafatlandırma mərasimi onlayn formatda keçirilib.