İran-İsrail qarşıdurmasında dördüncü gün
Bakı, 16 iyun, Rabil Kətanov, AZƏRTAC
İran-İsrail qarşıdurması artıq dörd gündür davam edir. Tərəflər qarşılıqlı raket zərbələri endirməkdədir. Hər iki tərəfin rəsmi şəxslərinin açıqlamalarından belə aydın olur ki, münaqişə tezliklə yekunlaşmayacaq.
AZƏRTAC İRNA agentliyinə istinadla xəbər verir ki, bu gün səhər saatlarında İranın Kirmanşah şəhəri raket zərbəsinə məruz qalıb. İsrail tərəfinin yaydığı məlumata görə, bu şəhərdəki hərbi baza və neft anbarı partladılıb. Lakin İran hökumətinin nümayəndəsi Fatimə Mühacirian Tehranda keçirdiyi mətbuat konfransında bildirib ki, raketlərdən biri Kirmanşadakı Fərabi xəstəxanasına düşüb, ölən və yaralananlar var. Hökumət nümayəndəsi onu da deyib ki, bu günədək 45 qadın və uşaq həlak olub, 75 qadın və uşaq isə yaralanıb. İranın Qızıl Aypara Cəmiyyəti Tehranı və digər şəhərləri tərk edərək təhlükəsiz yerlərə köçən əhalini ərzaq, su və çadırlarla təmin edir. Bildirilib ki, hökumət təhlükəsizliyi nəzərə alaraq bəzi yerlərdə internetin sürətini zəiflədib. Bu gün Kirmanşahla yanaşı, İranın Məşhəd, Şiraz, Əhvaz, Zəncan Hörmüzgan, Həmədan və Loristan şəhərləri də raket zərbələrinə məruz qalıb. Məşhədin beynəlxalq hava limanının bir hissəsi dağılıb. İran isə öz növbəsində İsrailin Təl-Əviv, Hayfa, Bat-Yam, Yafa şəhərlərini raket atəşinə tutub.
İsrailin baş nazirinin ofisinin yaydığı məlumata əsasən, İran ölkə ərazisinə 370 ballistik raket atıb. Dağıntılarla yanaşı, ümumilikdə 24 nəfər ölüb, 592 nəfər isə yaralanıb. İsrail ordusunun rəsmi nümayəndəsi Efi Defrin mətbuat nümayəndələrinə bildirib ki, İranın 120 raket buraxılış qurğusu məhv edilib və İsrailin hərbi aviasiyası İran səmasını nəzarətdə saxlayır.
Bu gün Tehranda keçirdiyi mətbuat konfransında jurnalistlərin suallarını cavablandıram İran Xarici İşlər Nazirliyinin mətbuat katibi İsmail Bəqai Qərb dövlətlərinin ikiüzlü və riyakar siyasətini qınayaraq vurğulayıb ki, bütün beynəlxalq qanunlar dünya ictimaiyyətinin gözü qarşısında tapdalanır. O qeyd edib ki, ABŞ BMT Təhlükəsiz Şurasının üzvü kimi İsrailin İran ərazisini bombalamasına münasibət bildirməyib. İndiki dövrdə ABŞ-la danışıqları davam etdirmək mənasızdır.
Bu gün, həmçinin Atom Enerjisi üzrə Beynəlxalq Agentliyin (AEBA) İdarə Heyətinin Vyanada keçirilən iclasında İranın nüvə obyektlərinin raket zərbəsinə məruz qalması məsələsi müzakirə olunub. AEBA rəhbəri Rafael Qrossi bildirib ki, nüvə obyektlərinin raketlə vurulması BMT-nin Nizamnaməsinə və agentliyin prinsiplərinə, eləcə də digər beynəlxalq normalara ziddir. R, Qrossi diqqətə çatdırıb ki, İranın Natanz nüvə obyekti vurulsa da, radiasiya səviyyəsi normanı aşmayıb.
Bu gün İsrailin Baş naziri Benyamin Netanyahu Tehran sakinlərinə müraciət edərək, onlardan şəhəri tərk etmələrini istəyib. Lakin bu müraciətə baxmayaraq, Tehranda həyat davam edir. İranda çalışan müxtəlif televiziya kanallarının müxbirlərinin verdikləri məlumatlara görə, artıq dördüncü gündür ki, İran raket zərbələrinə məruz qalsa da, əhali ölkəni tərk etmir. İran daxilində insanlar daha təhlükəsiz yerlərə köçür, lakin ölkədən köç müşahidə olunmur.
Eyni zamanda, bu gün Tehranda İsrailə casusluq edən bir nəfər edam edilib.
Bölmənin digər xəbərləri
