İraqın xəbər portalında Zəfər Günü ilə əlaqədar məqalə dərc olunub
Bağdad, 14 noyabr, AZƏRTAC
Azərbaycanın İraqdakı müvəqqəti işlər vəkili Nəsir Məmmədovun “addustor.com” saytında Zəfər Günü ilə əlaqədar məqaləsi dərc olunub.
AZƏRTAC xəbər verir ki, diplomat məqaləsində Azərbaycanın Qarabağı erməni işğalından azad etməsi barədə geniş məlumat verib. Qeyd olunub ki, BMT Təhlükəsizlik Şurasının Azərbaycanın işğal olunan ərazilərinin boşaldılması haqqında 4 qətnaməsi 27 il kağız üzərində qaldı. Ermənistan bu qətnamələri icra etmədi. Ötən il sentyabrın 27-də Ermənistanın cəbhə xəttində təxribatlarına cavab olaraq Müzəffər Ali Baş Komandan İlham Əliyevin əmrinə əsasən, ordumuz irəliləyərək Qarabağı və qədim Şuşa şəhərini işğaldan azad etdi.
Nəzərə çatdırılıb ki, işğal olunan rayonlarda evlər, inzibati binalar, tarixi abidələr, hətta məscidlər belə dağıdılıb, ətraf mühitə böyük zərər vurulub.
Bu gün Azərbaycan dövləti işğaldan azad olunan rayonlarda genişmiqyaslı quruculuq işləri həyata keçirir. Müasir üslubda “Ağıllı kənd”, “Ağıllı şəhər” layihələri reallaşdırılır. Artıq Füzuli şəhərində beynəlxalq aeroport istifadəyə verilib. Məcburi köçkünlərin öz doğma yurdlarına qayıtması üçün geniş zəmin yaradılır.
Məqalədə nəzərə çatdırılıb ki, İraq hər zaman Azərbaycanın ərazi bütövlüyünü tanıyıb və suverenliyinə hörmətlə yanaşıb. İraq xalqı Azərbaycanın qələbəsinə sevinir və dost xalqı dəstəklədiyini ifadə edir. Azərbaycanın İraqdakı səfirliyinə daxil olan təbrik məktubları bunu deməyə əsas verir.
Rabil Kətanov
AZƏRTAC-ın xüsusi müxbiri
Bağdad
Bölmənin digər xəbərləri
