“İSLAM İQTİSADİYYATI VƏ İSLAM BANKÇILIĞININ ƏSASLARI VƏ PRAKTİKASI” MÖVZUSUNDA SEMİNAR İŞƏ BAŞLAMIŞDIR
AZƏRTAC xəbər verir ki, aprelin 7-də Azərbaycan Dövlət İqtisad Universitetinin (ADİU) Heydər Əliyev İqtisadi İrsinin Öyrənilməsi Mərkəzində “İslam iqtisadiyyatı və islam bankçılığının əsasları və praktikası” mövzusunda dördgünlük seminar işə başlamışdır.
Ayrı-ayrı ölkələri, o cümlədən Rusiya, Qazaxıstan və Özbəkistanı təmsil edən nümayəndələrin də iştirak etdikləri seminarın açılış mərasimində ADİU-nun rektoru, Milli Məclisin elm və təhsil məsələləri daimi komissiyasının sədri, professor Şəmsəddin Hacıyev bildirmişdir ki, İslam iqtisadiyyatı və İslam bankçılığı, xüsusilə ötən əsrin 70-ci illərinin ortalarından başlayaraq, son üç onillik ərzində nəzərəçarpacaq artıma nail olmuşdur.
Eyni zamanda qeyd olunmuşdur ki, bir çox müsəlman dövlətləri öz iqtisadi və maliyyə sahələrini İslam maliyyə əsaslarına tam uyğunlaşdırılmış şəkildə transformasiya etmişlər. Bununla yanaşı, bir sıra MDB ölkələri İslam maliyyə biznesinə doğru atılan praktiki addımlara maraq göstərirlər. Bu və digər səbəblərə görə İslam İnkişaf Bankı Qrupunun üzvü olan İslam Tədqiqat və Təlim İnstitutu (İTTİ) və ADİU MDB dövlətlərində təkrar olaraq həyata keçiriləcək müvafiq kursu təşkil etmək üçün səylərini birləşdirmişdir.
Sonra İTTİ-nin əlaqələndiricisi Feysal Slama seminarda İslam iqtisadiyyatı və İslam bankçılığının əsas konsepsiya və vasitələri barədə ətraflı məlumatlar veriləcəyini bildirmişdir.
Bölmənin digər xəbərləri
