İslamabadda COVID-19 pandemiyası ilə əlaqədar videokonfrans təşkil olunub
İslamabad, 15 aprel, АZƏRTAC
Azərbaycanın Pakistandakı səfirliyi bu ölkənin aparıcı beyin mərkəzlərindən biri olan Qlobal və Strateji Araşdırmalar Mərkəzinin (CGGS) təşəbbüsü ilə “Avrasiya ölkələri koronavirusa qarşı hansı preventiv tədbirləri görür və onların təklifləri” adlı videokonfrans keçirib.
AZƏRTAC xəbər verir ki, konfransda Azərbaycan, Özbəkistan, Qazaxıstan, Rusiya və Tacikistanın Pakistandakı səfirləri və digər diplomatları ilə yanaşı, CGGS-in prezidenti, ehtiyatda olan general-mayor Seyid Xalid Əmir Cefri, mərkəzin icraçı direktoru Xalid Teymur Əkrəm, Məşvərət Şurasının üzvləri, keçmiş Müdafiə naziri, ehtiyatda olan general-leytenant Naim Xalid Lodhi, ehtiyatda olan general Axtar Navaz Cancua və digər şəxslər iştirak ediblər.
Videokonfransda Azərbaycanın Pakistandakı səfiri Əli Əlizadə, səfirliyin diplomatları və hərbi attaşesi müzakirələrə qoşularaq koronavirus xəstəliyinin Azərbaycan ərazisində yarada biləcəyi təhlükənin qarşısının alınması, ölkəmizdə həyata keçirilən profilaktik və təxirəsalınmaz tədbirlər haqqında məlumatları bölüşüblər.
Ölkəmizin Pakistandakı səfiri Əli Əlizadə dünya ölkələrində koronavirus infeksiyasına yoluxma halının yayılması məlum olduqdan dərhal sonra Azərbaycan Respublikası Nazirlər Kabinetinin yanında aidiyyəti dövlət orqanlarının və qurumlarının rəhbər şəxslərindən ibarət Operativ Qərargahın yaradıldığını, vəziyyətin nəzarətə götürüldüyünü və hazırda da vəziyyətin birbaşa ölkə Prezidentinin diqqətində olduğunu bildirib.
Səfir Azərbaycanda xəstəliyə ilk yoluxma halının aşkarlanmasından dərhal sonra bütün təlim-tərbiyə və təhsil müəssisələrinin fəaliyyətinin dayandırıldığını, hazırda televiziya vasitəsilə birbaşa dərslərin yayımına başlandığını, “Virtual məktəb” layihəsinə start verildiyini vurğulayıb. Aprelin 5-dən Azərbaycanda xüsusi karantin rejiminin tətbiq olunduğunu, ölkəmizdə yaşayan yerli və xarici vətəndaşların mağaza və əczaxanalara getmək, səhiyyə müəssisələrini ziyarət etmək və digər zəruri işlərlə əlaqədar yaşayış yerini tərk etmək üçün SMS xidməti vasitəsilə icazə almalarının lazım gəldiyini, yaşı 65-dən yuxarı insanlara evdən çıxmağın qadağan edilərək, bu kateqoriyadan olan və tənha yaşayan şəxslərə qanunvericiliyə əsasən sosial xidmətlərin göstərildiyini bildirib.
Azərbaycanda Koronavirusla Mübarizəyə Dəstək Fondunun yaradıldığını bildirən diplomat ilk olaraq Prezident İlham Əliyevin Birinci vitse-prezident Mehriban Əliyevanın bir illik əməkhaqlarını bu Fonda ianə etdiklərini vurğulayıb.
Səfir hazırda koronavirus xəstələrinin 20-dən artıq dövlət xəstəxanasında müalicə olunduğunu, 575 çarpayıdan ibarət müasir “Yeni Klinika” tibb müəssisəsinin açılaraq koronavirus xəstələrinin ixtiyarına verildiyini, ölkəmizin 3 şəhərində ümumi çarpayı sayı 500-dən artıq üç yeni xəstəxananın, Azərbaycanda daxili tələbatı ödəmək üçün tibbi maska istehsalı müəssisəsinin fəaliyyətə başladığını, qısa müddət ərzində isə hər birinin 200 çarpayı yeri olan 10 müasir modul tipli xəstəxananın istifadəyə verilməsinin nəzərdə tutulduğunu qeyd edib.
Diplomat indiyədək 15 mindən artıq Azərbaycan vətəndaşının başqa ölkələrdən təxliyə olunduğunu diqqətə çatdırıb, koronavirusun yaratdığı iqtisadi və sosial çətinlikləri aradan qaldırmaq üçün bu günədək 2,5 milyard manat vəsaitin ayrıldığını və dəstəyin davam etdiyini, koronavirusa yoluxmuş insanlara xidmət edən həkimlərin maaşının 3-5 mislinədək artırıldığını vurğulayıb.
Səfir Əli Əlizadə Azərbaycanın dünyada koronavirus infeksiyasının yayılması riskinin qarşısının alınması istiqamətində beynəlxalq birliyin səylərinə töhfə məqsədilə Ümumdünya Səhiyyə Təşkilatına 5 milyon dollar maliyyə yardımı ayırdığını, bu pandemiya ilə kollektiv mübarizənin və əməkdaşlığın önəmini də qeyd edib.
Diplomat koronavirusun yaratdığı iqtisadi və sosial çətinliklərin aradan qaldırılması istiqamətində Azərbaycanda həyata keçirilən bir sıra digər tədbirlər haqqında da məlumat verib, Pakistanın pandemiya ilə mübarizədə gördüyü tədbirlərə toxunub, əməkdaşlığa görə Pakistan hökumətinə və xalqına təşəkkür edib.
Konfransda iştirak edənlərin Azərbaycana və digər ölkələrə aid sualları çıxışçılar tərəfindən cavablandırılıb və xəstəliyə qarşı birgə mübarizə ilə bağlı təklifləri dinlənilib.
Qulu Kəngərli
AZƏRTAC-ın xüsusi müxbiri
İslamabad
Bölmənin digər xəbərləri
