İstismara qəbul olunmuş obyektlərin 26 faizinə çıxarış verilib
Bakı, 23 oktyabr, AZƏRTAC
Azərbaycan Prezidentinin “Qeyri-yaşayış təyinatlı bəzi tikinti obyektlərinin istismarına icazə verilməsi ilə bağlı əlavə tədbirlər haqqında” Fərmanının icrasına başlanıldığı dövrdən oktyabrın 14-dək 18 min 523 müraciət daxil olub.
AZƏRTAC Əmlak Məsələləri Dövlət Xidmətinə istinadla xəbər verir ki, istismara qəbul olunmuş 4956 obyektin 3931-nə dövlət reyestrindən çıxarış verilib.
Tikinti-quraşdırma işləri 2023-cü il iyunun 1-dək başa çatmış, şəhərsalma və tikinti qanunvericiliyinin ayrı-ayrı tələblərinə tam riayət olunmadan inşa olunmuş qeyri-yaşayış təyinatlı obyektlərin sənədlərinin qəbulu prosesi müvafiq icra hakimiyyəti orqanları tərəfindən hazırda davam edir və bu müddət 2026-cı il yanvarın 1-də başa çatır.
Sahibkarlar bu müddətədək tələb olunan sənədlərlə müraciət edərək mövcud imkandan yararlana bilərlər.
Qeyri-yaşayış binalarına mülkiyyət hüququnu təsdiq edən sənədlərin verilməsi sahibkarlıq fəaliyyətinin genişləndirilməsinə, daşınmaz əmlak bazarının canlanmasına geniş imkanlar yaradır. Belə ki, sahibkarlar mülkiyyət hüququ dövlət qeydiyyatına alınmış əmlakını girov, sığorta, alqı-satqı və digər əməliyyatlar üçün istifadə edə bilərlər. Fərmanın icrası qeyri-yaşayış təyinatlı tikinti obyektlərinin təhlükəsiz istismarının təmin edilməsi baxımından da xüsusi önəm kəsb edir.
Sözügedən Fərmanda edilmiş dəyişikliyə əsasən, bu cür obyekt sahibləri 2026-cı il yanvarın 1-dək tələb olunan sənədlərlə Fövqəladə Hallar Nazirliyinin regional mərkəzlərinə müraciət edə bilərlər.
Bölmənin digər xəbərləri
