İSVEÇRƏ KONFEDERASİYASININ PREZİDENTİ BU ÖLKƏDƏKİ AZƏRBAYCAN DİASPORUNUN RƏHBƏRİNƏ MƏKTUB GÖNDƏRMİŞDİR
Bakı, 3 noyabr (AZƏRTAC). Azərbaycan Respublikası Diasporla İş üzrə Dövlət Komitəsinin mətbuat xidmətindən bildirmişlər ki, İsveçrə Konfederasiyasının Prezidenti Hans-Rudolf Merts Azərbaycanlıların İsveçrədəki Mədəniyyət Mərkəzinin rəhbəri Qasım Nəsirova məktub göndərmişdir.
Məktubda dövlət başçısı mərkəzin İsveçrə və Azərbaycan arasında mədəniyyət sahəsində əlaqələri genişləndirdiyi və dərinləşdirdiyi üçün, eləcə də isveçrəlilərə Azərbaycan mədəniyyətini yaxından tanıtdırdığına, yüksək səviyyədə təbliğ etdiyinə görə təşəkkürünü bildirmiş və quruma gələcək işlərində uğurlar arzu etmişdir.
İsveşrədə Azərbaycan mədəniyyəti günlərinin açılışında səslənən musiqiyə böyük maraq göstərdiyini vurğulayan Prezident Hans-Rudolf Merts məktubunda əlavə etmişdir ki, bu musiqini eşidən hər kəsdə Azərbaycan mədəniyyətini daha dərindən öyrənmək istəyi oyanır.
Xatırladaq ki, İsveçrənin paytaxtı Berndə Azərbaycan mədəniyyəti günlərinin rəsmi açılışı oktyabrın 19-da Azərbaycan Respublikasının Prezidenti İlham Əliyevin bu ölkəyə rəsmi səfəri zamanı olmuşdur. Mərasimdə Azərbaycan Prezidenti İlham Əliyev və xanımı, İsveçrə Konfederasiyasının Prezidenti Hans-Rudolf Merts və xanımı iştirak etmişlər.
######
Bölmənin digər xəbərləri
