İTALİYA NAZİRLƏR ŞURASININ SƏDRİ İRAQA GƏLMİŞDİR
AZƏRTAC-ın “Novosti” agentliyindən aldığı xəbərə görə, İtaliya Nazirlər Şurasının sədri Silvio Berluskoni ölkənin Silahlı Qüvvələri Baş Qərargahının rəisi admiral Di Paolun müşayiəti ilə aprelin 10-da İraqa, Nəsiriyyə şəhəri yaxınlığında yerləşdirilmiş milli hərbi hissəyə gəlmişdir. Berluskoni burada xidmət keçən təxminən üç min İtaliya hərbi qulluqçusunu Pasxa bayramı münasibətilə təbrik edərək demişdir: ”Mən bura təkcə Baş nazir kimi deyil, həm də İtaliya vətəndaşı kimi sizin hamınızı təbrik etməyə gəlmişəm. Biz sizinlə fəxr edirik. Siz İtaliyanın dünyada hüquq prinsiplərini bərqərar edə biləcək bir ölkə olduğunu göstərmək kimi çox mühüm vəzifəni yerinə yetirirsiniz. Dünya birliyi sizin fəaliyyətinizi yüksək qiymətləndirir”.
Baş nazir Nəsiriyyədə baş vermiş son hadisələri milli hərbi kontingentin komandanlığı ilə müzakirə etmişdir. Xatırladaq ki, aprelin 6-da İtaliya hərbçiləri ilə üsyançılar arasında silahlı toqquşmalar nəticəsində 15 iraqlı həlak olmuş, 11 İtaliya hərbçisi yaralanmışdır.
Bölmənin digər xəbərləri
