İtaliya Prezidentinin Azərbaycana səfəri ölkəmizin sabit mövqeyinin daha da möhkəmləndiyini təcəssüm etdirir – RƏY
Bakı, 2 oktyabr, AZƏRTAC
İtaliya Prezidentinin Azərbaycana səfəri zamanı İtaliya-Azərbaycan Universitetinin tədbir korpuslarının açılması iki ölkə arasında təhsil və mədəni əməkdaşlıq sahələrində əlaqələrin inkişafına yeni təkan verəcək. Belə ki, İtaliya-Azərbaycan Universitetinin fəaliyyəti iki ölkə arasında insan resursları, elmi tədqiqatlar və mədəni əlaqələrin gücləndirilməsinə xidmət göstərəcək. Burada əkinçilik, aviasiya texnologiyaları, memarlıq, dizayn və digər fənlərin tədrisi nəzərdə tutulub.
Bu fikirləri AZƏRTAC-a açıqlamasında Milli Məclisin deputatı, parlamentin Ailə, qadın, uşaq məsələləri komitəsinin sədr müavini Jalə Əliyeva səsləndirib.
“Səfər çərçivəsində Prezident İlham Əliyev və Prezident Sercio Mattarella çıxışlarında bir sıra mühüm mesajlar da verdilər. Belə ki, Prezident İlham Əliyev İtaliyanı Azərbaycanın əsas ticarət tərəfdaşlarından biri kimi xarakterizə edərək, ikitərəfli əlaqələrin enerji sektorunda xüsusi rol oynadığını vurğuladı. Dövlətimizin başçısı TAP (Trans-Adriatik Boru Kəməri) boru kəmərini xatırladaraq, bu layihədəki dəstəyinə görə İtaliya Prezidentinə xüsusi təşəkkürünü bildirdi. Həmçinin elektrik enerjisinin ixracı və enerji layihələrinin genişləndirilməsi barədə planlardan bəhs etdi.
Sercio Mattarella isə İtaliya ilə Azərbaycan arasındakı əlaqələri "möhtəşəm" adlandıraraq, mədəni, iqtisadi və siyasi bağların güclü olduğunu qeyd etdi. O, İtaliya-Azərbaycan Universitetinin açılışını və ölkələrarası əməkdaşlığın dərindən inkişafını simvolik addım kimi qiymətləndirdi”, - deyə deputat diqqətə çatdırıb.
J.Əliyeva əlavə edib ki, səfərin ən diqqətçəkən tərəflərindən biri enerji sahəsindəki əməkdaşlığın gücləndirilməsi idi. İtaliya uzun müddətdir ki, Azərbaycanın neft və qaz ixracında mühüm istehlakçıdır. Cənub Qaz Dəhlizi, o cümlədən TAP kəməri vasitəsilə Azərbaycan qazı İtaliyaya daşınır. Bu layihə Avropanın enerji təhlükəsizliyinə töhfə verir. Bu cür enerji ticarəti qarşılıqlı fayda yaratmaqdadır. Eyni zamanda, İtaliyanın enerji balansında Azərbaycan nefti böyük paya sahibdir. Bundan əlavə, SOCAR şirkəti İtaliyada fəaliyyət göstərən “Italiana Petroli” (IP) şirkətinin böyük payını almaq üçün razılaşmalar imzalayıb. Bu, Azərbaycan ilə İtaliya arasında enerji və investisiya sahələrində yeni mərhələdir. Bu kimi investisiyalar yalnız xam neft-qaz ixracı ilə məhdudlaşmır, Azərbaycanda enerji infrastrukturu, logistika və texnologiya mübadiləsi istiqamətlərində əməkdaşlığı da gündəmə gətirir.
“Bu səfər yalnız ikitərəfli əlaqələr baxımından deyil, həm də region üçün mühüm mesajları ehtiva edirdi. Belə ki, Azərbaycanın sahib olduğu enerji resursları Avropanın enerji təchizatında və investisiya qoyuluşunda ölkəmizin strateji mövqeyini gücləndirir. Eyni zamanda, Avropa İttifaqı-Azərbaycan münasibətlərində İtaliyanın dəstəyi diqqət çəkir. Rəsmi Roma Bakı ilə Brüssel arasındakı əlaqələri gücləndirməyə çalışır.
İtaliya Prezidentinin Azərbaycana səfərinin uzunmüddətli nəticələri və təsiri haqqında danışarkən, həmçinin qeyd etməliyik ki, bu səfər siyasi əlaqələrə yeni dinamika gətirməklə bərabər, ölkəmizlə beynəlxalq platformalarda həmrəylik imkanlarını gücləndirir və Azərbaycanın sabit mövqeyinin daha da möhkəmləndiyini təcəssüm etdirir”, - deyə o vurğulayıb.
Bölmənin digər xəbərləri
