Kamilə Əliyeva: Vətəndaşlarımız təhlükədən yayınmaq üçün Operativ Qərargahın tövsiyələrinə ciddi əməl etməlidirlər
Bakı, 23 iyun, AZƏRTAC
Son aylar Azərbaycanda COVID-19 infeksiyasına yoluxma sayı azalmaya doğru gedir, sağalanların sayı yoluxanların sayını nisbət etibarilə bir neçə dəfə üstələyir. Ölüm halları minimum səviyyəyə enib və bu gün ölkəmizdə epidemioloji vəziyyət qənaətbəxş səviyyədədir.
Bunu AZƏRTAC-a açıqlamasında Milli Məclisin deputatı Kamilə Əliyeva deyib.
Deputat vurğulayıb ki, bütün bunlar ölkə rəhbərliyinin, Prezident İlham Əliyevin pandemiyanın ilk günlərindən həyata keçirdiyi hərtərəfli qabaqlayıcı tədbirlərin nəticəsidir. Dövlətimizin başçısının göstərişinə əsasən, koronavirus təhlükəsinin azaldılması və müvafiq tədbirlərin həyata keçirilməsi məqsədilə Nazirlər Kabineti yanında Operativ Qərargah yaradıldı. Bir sıra dövlət xəstəxanaları koronavirus xəstələrinin müalicəsi üçün səfərbər edildi. Müasir tipli xəstəxana vaxtından əvvəl istifadəyə verildi. Çox qısa müddətdə Bakı və bölgələrdə modul tipli xəstəxanalar tikildi.
K.Əliyevanın sözlərinə görə, yoluxma hallarının pik vaxtlarında Türkiyədən, Rusiyadan, Kubadan yüksəkixtisaslı həkimlər və tibbi heyət Azərbaycana dəvət edildi. Bütün dünyada tibbi maskaların və ləvazimatlarının çatışmadığı vaxtlarda Azərbaycanda tibbi maska və xüsusi geyim istehsal edən müəssisələr yaradıldı. Həmçinin pandemiya səbəbindən iş yerlərini itirmiş, muzdla çalışan vətəndaşlara hər ay 190 manat birdəfəlik ödənişlər edildi. Pandemiyadan ziyan çəkmiş sahibkarlara dövlət büdcəsindən 2,5 milyard ABŞ dolları həcmində vəsait ayrıldı. Ölkə rəhbərliyi tərəfindən vətəndaşlarımızın sağlamlığı və rifahı naminə bütün zəruri addımlar atılıb. Bu gün hər birimiz bunun müsbət nəticəsini görürük.
“Koronavirusa qarşı peyvənd hazırlanıb istehsala başlandıqdan sonra bütün dünyada yeni bir qlobal problem meydana gəldi. Dünya əhalisi arasında vaksin çatışmazlığı problemi yarandı. Bəzi böyük və inkişaf etmiş ölkələr öz əhalilərinin sayından çox vaksin aldılar. Yoxsul, az inkişaf etmiş dövlətlərin əhalisinin sağlamlığı təhlükə ilə üzləşdi. Problemlə əlaqədar Prezident İlham Əliyev Qoşulmama Hərəkatının sədri kimi BMT-nin Xüsusi Sessiyasında çıxış edərək bütün dünya ölkələrini ədalətli olmağa çağırdı. Azərbaycan Liderinin bu çıxışı dünya ictimaiyyəti tərəfindən rəğbətlə qarşılandı. Prezident İlham Əliyev dünyaya bir daha bəyan etdi ki, Azərbaycan hər zaman ədalətin, insanpərvərliyin tərəfdarıdır”, - deyə deputat vurğulayıb.
Diqqətə çatdırılıb ki, Çin vaksin istehsal edən ilk dövlət oldu. Bundan sonra Rusiya və bir neçə Avropa dövləti vaksin istehsalına başladı. Vaksinlərin digər dövlətlərə verilməsi zamanı Prezident İlham Əliyevin güclü dövlət başçısı və yüksək şəxsi nüfuza malik olması bir daha sübuta yetirildi. Belə ki, Azərbaycan öz vətəndaşlarını vaksinlə təmin edən ilk dövlətlərdən biri oldu. 2021-ci il yanvarın 18-dən vətəndaşlarımız vaksinasiya olunmağa başladı. Artıq ölkəmizdə 4 ölkənin istehsal etdiyi vaksinlərdən istifadə edilir. Hər bir vətəndaşımız könüllü şəkildə istədiyi ölkənin vaksinini vurdura bilər. Bu işlər ölkəmizdə uğurla və sürətlə aparılır. Artır birinci və ikinci doza vaksin vurulanların sayı 2,5 milyon nəfərdən çoxdur.
2021-ci ilin əvvəllərindən başlayan vaksinasiya və görülmüş digər tədbirlər nəticəsində ölkəmizdə epidemioloji vəziyyətin daha da yaxşılaşdığını vurğulayan deputat qeyd edib ki, artıq bir sıra məhdudiyyətlər aradan qaldırılıb. Açıq havada maskasız gəzmək mümkündür, metro və ictimai nəqliyyatın hərəkəti bərpa olunub, idman zalları açılıb, böyük ticarət mərkəzləri fəaliyyətə başlayıb, iyulun 1-dən müəyyən şərtlər nəzərə alınmaqla, toy və nişan mərasimlərinin keçirilməsinə də icazə veriləcək.
K.Əliyeva bildirib ki, məhdudiyyətlər aradan qaldırıldıqca insanlar əvvəlki həyat tərzlərinə qayıdacaqlar. Digər tərəfdən, təhlükə hələ də qalmaqdadır. Bir çox ölkələrdə, xüsusilə qonşu Rusiya və Gürcüstanda vəziyyət təhlükəli həddə çatıb. Rusiyanın paytaxtı Moskva şəhərində pandemiya başlayandan rekord sayda yoluxma qeydə alınıb. Bu şəhərdə yenidən məhdudiyyətlər tətbiq olunmağa başlanıb. Gürcüstanda gündəlik yoluxma 1000-ə yaxınlaşıb, ölüm sayı 24 nəfərə çatıb. Bu ölkənin əsas gəliri turizmdən olduğundan sərhədlərini tam açıb, bu da vəziyyəti daha da gərginləşdirib. “Bir faktı da nəzərə almaq lazımdır ki, Rusiyada da, Gürcüstanda da yoluxanların əksər hissəsi Hindistan ştammı ilə yoluxublar. Rusiya və Gürcüstan bizimlə qonşu olduğundan bu virusun Azərbaycana keçmə ehtimalı çox yüksəkdir. Hindistan ştammının təhlükəli olması ondan ibarətdir ki, bu virus hüceyrələrə daxil olduğu təqdirdə, anticisimlərə qarşı davamlı olur.
Vətəndaşlarımız təhlükədən yayınmaq üçün Operativ Qərargahın tövsiyələrinə ciddi əməl etməli və vacib olmadığı təqdirdə xarici dövlətlərə səfər etməkdən çəkinməlidirlər. Bununla onlar həm özlərinin, həm də başqalarının sağlamlığını qorumuş olarlar”, - deyə deputat fikirlərini yekunlaşdırıb.
Bölmənin digər xəbərləri
