KANADA AZƏRBAYCAN İLƏ ƏLAQƏLƏRİN İNKİŞAFINA BÖYÜK ƏHƏMİYYƏT VERİR
Xarici İşlər Nazirliyinin mətbuat mərkəzindən AZƏRTAC-a bildirmişlər ki, nazir Vilayət Quliyev bu səfərin Kanada ilə Azərbaycan arasındakı dostluq münasibətlərinin möhkəmlənməsi və işgüzar əlaqələrin genişlənməsi üçün faydalı olacağını, iki ölkə arasındakı əməkdaşlığın perspektivinə müsbət təsir göstərəcəyinə dərin inam yaratdığını qeyd etmişdir. Nazir Kanada və Azərbaycan arasında əlaqələrin digər sahələrdə də genişlənməsinə və həmçinin beynəlxalq təşkilatlar çərçivəsində səmərəli əməkdaşlığın davam etdirilməsinə tərəfdar olduğunu bildirmişdir.
Görüş zamanı Devid Preston səfərinin məqsədini iki dövlət arasında müxtəlif sahələrdə əlaqələrin genişlənməsi istiqamətində fikir mübadiləsi aparılmaqdan ibarət olduğunu diqqətə çatdırmışdır. Qonaq, həmçinin Kanada ilə Azərbaycan arasındakı əlaqələrin bütün sahələrdə inkişaf etdirilməsinə ölkəsinin böyük əhəmiyyət verdiyini, beynəlxalq təşkilatlarda daha sıx əməkdaşlığın davam etdirilməsinin zəruriliyini vurğulamışdır.
Sonra nazir Vilayət Quliyev Ermənistan-Azərbaycan, Dağlıq Qarabağ münaqişəsi və onun həlli istiqamətində görülən işlər və qaçqınların ağır vəziyyəti barədə qonağa ətraflı məlumat vermiş, həmçinin bu münaqişənin beynəlxalq hüququn prinsip və normaları əsasında tezliklə həlli üçün dünya birliyin səylərinin artırılmasının vacibliyini qeyd etmişdir.
Son dövrlərdə Azərbaycanda baş verən proseslər haqqında qonağı məlumatlandıran nazir, bütün mövcud cətinliklərə baxmayaraq, Azərbaycanda sivil və demokratik cəmiyyət quruculuğu sahəsində nailiyyətlərin əldə olunduğunu bildirmişdir. Bakı-Tbilisi-Ceyhan ixrac neft kəmərinin uğurla tikildiyini xatırladan nazir, iqtisadi inkişaf sahəsində Azərbaycanın bölgədə öncül mövqe tutduğunu xüsusilə qeyd etmişdir. Nazir, həmçinin erməni işğalı nəticəsində 1 milyondan çox qaçqının və məcburi köçkünün Azərbaycanı ciddi çətinliklərlə üz-üzə qoyduğunu qonağın diqqətinə çatdırmışdır.
Ermənistan-Azərbaycan, Dağlıq Qarabağ münaqişəsinə toxunan Devid Preston bu problemin tezliklə beynəlxalq birliyin birgə səyləri əsasında sülh yolu ilə həll ediləcəyinə ümidvar olduğunu vurğulamışdır.
Görüşdə qarşılıqlı maraq doğuran bir sıra məsələlər də müzakirə edilmişdir.
Bölmənin digər xəbərləri
