KANOEÇİLƏRİMİZ AVROPA ÇEMPİONATINA POLŞADA HAZIRLAŞIRLAR
Bakı, 6 iyun (AZƏRTAC). Azərbaycan kanoeçiləri iyunun 25-28-də Almaniyanın Brandenburq şəhərində Avropa çempionatında mübarizə aparacaqlar.
Azərbaycan Milli Avarçəkmə Federasiyasından (AMAF) bildirmişlər ki, hazırda idmançılarımız Poznan şəhərindən 60 kilometr qərbdə yerləşən Lonjiçki avarçəkmə bazasında kayak və kanoe üzrə milli komandanın baş məşqçisi Aleksandr Kolıbelnikovun rəhbərliyi altında təlim-məşq toplanışındadır.
A.Kolıbelnikov AMAF-ın mətbuat xidmətinə açıqlamasında hazırlıq prosesindən və onlar üçün yaradılan şəraitdən razılığını bildirmişdir. “Burada hər gün 5 saatadək məşq edirik. Federasiyamızın rəhbərliyinin köməyi sayəsində müasir tipli qayıqlar və avarlarla təchiz olunmuşuq. İlk günlərdə hava şəraiti normal idi. Son günlər bir qədər yağışlı hava müşahidə edildiyindən, zalda xüsusi qurğu olan konseptlə məşğul oluruq”.
Yığma komandamız iyunun 23-dək hazırlığını Polşada davam etdirəcək. Ertəsi gün isə kanoeçilərimiz Almaniyaya yollanacaqlar.
Avropa çempionatında ölkəmizi ötən ay Poznanda keçirilmiş dünya kubokunun ikinci mərhələsində 2 gümüş, 1 bürünc medal qazanan Azərbaycan kanoeçiləri - Valentin Demyanenko və Sergey Bezuqlıy-Maksim Prokopenko dueti təmsil edəcəkdir.
Bölmənin digər xəbərləri
