Keçən il Samuxda 422 yeni sahibkarlıq subyekti fəaliyyətə başlayıb
Samux, 5 mart, Rauf Hacıyev, AZƏRTAC
Prezident İlham Əliyevin respublikamızda sahibkarlığın inkişafı məqsədilə imzaladığı sərəncamlara, verdiyi tapşırıq və tövsiyələrə uyğun olaraq Samux rayonunda da bu sahənin inkişafına diqqət göstərilir.
Rayon icra hakimiyyətindən AZƏRTAC-ın bölgə müxbirinə bildirilib ki, il ərzində Samuxda 422 yeni sahibkarlıq subyekti fəaliyyətə başlayıb. Həmin sahibkarlıq subyektlərindən 14-ü hüquqi şəxsdir.
Hazırda rayonda 1879 sahibkarlıq subyekti fəaliyyət göstərir ki, onlardan da 102-si hüquqi şəxslərdir.
Prezident İlham Əliyevin ölkədə kənd təsərrüfatının inkişaf etdirilməsi, ərzaq təhlükəsizliyinin təmin edilməsi məqsədilə verdiyi müvafiq tapşırığa əsasən rayon ərazisində iri təsərrüfatların yaradılması istiqamətində işlər davam etdirilib. Hazırda rayonda “AQRO DAİRY” MMC, “Boz dağ” heyvandarlıq kompleksi, “Ulduz 2011” MMC, “Qarabağ Region MKT” MMC, “Vest Milk” MMC, Murovdağ Kəndli Fermer Təsərrüfatı, Heyvandarlıq və Yemçilik Müəssisəsi, “Region Aqro” MMC kimi iri sahibkarlıq təsərrüfatları fəaliyyət göstərir.
Eyni zamanda, rayonda 110 müasir istixana fəaliyyət göstərir ki, onların da ümumi sahəsi 77,5 hektardır. Bu istixanalarda il ərzində 8000 tondan çox faraş tərəvəz - pomidor, xiyar yetişdirilir. Bu məhsulların çox hissəsi MDB ölkələrinə ixrac olunur.
5000 hektar ərazidə yaradılmış “AQRO DAİRY” MMC 2019-cu ilin məhsulu üçün müəssisə tərəfindən 3306 hektar sahədə əkilmiş taxıl sahəsindən 7333 ton məhsul yığıb. Təkrar əkinlə 2720 hektar payızlıq qarğıdalı əkilərək 7826 ton məhsul toplanıb.
“Region Aqro” MMC tərəfindən 2019-cu ilin məhsulu üçün 562 hektar buğda sahəsindən 1602 ton, 253 hektar arpa sahəsindən 820 ton məhsul yığılıb. 493 hektarda təkrar əkin aparılıb, 4214 ton payızlıq qarğıdalı və 3669 ton silos istehsal olunub.
Qeyd edilib ki, rayon üzrə istehsal olunan taxıl məhsulunun 30,4 faizi, qarğıdalının isə 95 faizi məhz bu təsərrüfatların payına düşür.
Bölmənin digər xəbərləri
