KƏND TƏSƏRRÜFATI KREDİTLƏRİ AGENTLİYİ FƏALİYYƏTİNİ GENİŞLƏNDİRİR
- Azərbaycan Respublikası Prezidentinin “Aqrar bölmədə idarəetmənin təkmilləşdirilməsi tədbirləri haqqında” Sərəncamından sonra Kənd Təsərrüfatı Nazirliyinin strukturu yenidən təşkil edilmişdir. Bu sənədə uyğun olaraq nazirlik yanında 4 yeni qurum yaradılmışdır. Həmin qurumlardan biri də Kənd Təsərrüfatı Kreditləri üzrə Dövlət Agentliyidir.
Ötən müddət ərzində biz Agentliyin əsasnaməsini işləyib hazırladıq. Ölkə rəhbərinin Sərəncamı ilə əsasnaməmiz təsdiq olundu. İndi Agentlikdə üç beynəlxalq layihə üzrə işlər görülür. Bu layihələrin ikisi Azərbaycan hökuməti ilə Dünya Bankı arasında bağlanmış kredit sazişinə uyğun olaraq həyata keçirilir. Başqa bir layihə isə Kənd Təsərrüfatının İnkişafı üzrə Beynəlxalq Fond (İFAD) ilə bağlanmış saziş əsasında həyata keçirilir.
Biz “Kənd təsərrüfatının kreditləşməsi və inkişafı layihəsi”nin birinci mərhələsini başa çatdırmışıq. Layihənin ikinci mərhələsinə 2006-cı ilin iyun ayından başlayacağıq. İndi həmin mərhələ ilə bağlı hazırlıq işləri görürük.
Digər layihə “Kənd investisiya layihəsi” adlanır. Bu layihəni həyata keçirməyə başlamışıq.
İFAD ilə birgə reallaşdırdığımız layihə “Dağ və yüksək dağlıq ərazilərin inkişafı Proqramı”dır. Layihələr uğurla həyata keçirilir. Kredit sazişində nəzərdə tutulmuş müddəalar tam həcmdə yerinə yetirilir. Layihələrin həyata keçirilməsi üzrə beynəlxalq təşkilatlar monitorinq aparırlar.
Agentlik layihələr çərçivəsində kənd yerlərində yaşayan insanlara mikrokreditlər verir. Agentliyin vəsaitindən istifadə mexanizmi hazırlamışıq. Bu mexanizm müvafiq dövlət strukturları ilə razılaşdırılaraq, təsdiq edilmək üçün respublika hökumətinə təqdim olunacaqdır.
Dünya Bankı ilə birgə kənd təsərrüfatı siyasəti çərçivə sənədi işlənib hazırlanmışdır. Bu sənədi müvafiq dövlət qurumları bəyənmişdir. Praktiki işdə tədbiq etmək məsləhət görülmüşdür. Həmin sənədin tələblərinə uyğun olaraq bu gün Agentlikdə Azərbaycanın kənd təsərrüfatı üçün siyasət strategiyası sənədi və onun maliyyə və investisiya proqramları hazırlanmış, müvafiq qurumlarla razılaşdırılmışdır. Bu yaxınlarda həmin sənəd hökumətə təqdim ediləcəkdir. Bu, Agentliyin gördüyü işlərdən biridir.
Agentlik gələn il üçün aqrar sektorda çalışan fiziki və hüquqi şəxslərin kreditə olan ehtiyacını ödəmək üçün müvafiq qurumlar qarşısında məsələ qaldırmışdır. Azərbaycan Prezidentinin regionlara səfərləri zamanı təqdim olunmuş ərizələrdəki tələbləri yerinə yetirmək üçün həmin müraciətlər Agentliyə göndərilir. Maliyyə vəsaiti olmadığına görə ərazilərə müsbət cavab vermək mümkün olmur. Müraciət edənlərin tələblərini yerinə yetirə bilmirik. Agentlikdə bu problemin həlli istiqamətində müəyyən iş gedir.
Bölmənin digər xəbərləri
