KİŞİLƏR ARASINDA OTÜSTÜ XOKKEY ÜZRƏ AVROPA KLUB ÇEMPİONLARI “ÇELENC-3” YARIŞI BAŞLAMIŞDIR
Azərbaycan Otüstü Xokkey Federasiyasının mətbuat xidmətindən AZƏRTAC-a bildirmişlər ki, mayın 8-də Slovakiyanın paytaxtı Bratislavada kişilər arasında otüstü xokkey üzrə Avropa Klub Çempionları “Çelenc-3” yarışı start götürmüşdür.
B qrupunda yer alan Bakının “Atasport” klubu turnirdə ilk görüşünü Macarıstanın “Epitok” komandasına qarşı keçirmişdir. Görüş həmyerlilərimizin 2:1 hesablı qələbəsi ilə başa çatmışdır.
Sabah Azərbaycan təmsilçiləri Finlandiyanın “Tempu” klubu, mayın 10-da isə son görüşünü “Pliva Lipovçi”yə (Sloveniya) qarşı keçirəcəklər.
Otüstü xokkeyçilərimiz qrupda ilk iki pillədə qərarlaşacaqları təqdirdə, A qrupunun bir komandası ilə görüşəcəklər.
Turnirin iki ən yaxşı klubu növbəti mövsüm “Çelenc-2” divizionunda iştirak etmək hüququ qazanacaqdır.
Yarışlara mayın 11-də yekun vurulacaqdır.
Bölmənin digər xəbərləri
