KİYEVDƏ XOCALI FACİƏSİNƏ HƏSR OLUNMUŞ SƏRGİ AÇILMIŞDIR
Kiyev, 26 fevral (AZƏRTAC). Ukrayna paytaxtının rəsm qalereyasında Rasim Seydimovun Xocalı faciəsinə həsr olunmuş sərgisi açılmışdır. Ukrayna-Azərbaycan Dostluğu Beynəlxalq Xeyriyyə Fondu (UADBXF), Ukrayna Azərbaycanlıları Konqresi (UAK) və onun Kiyev təşkilatı tərəfindən təşkil olunmuş sərgi fevralın 10-dan Dneprepetrovsk, Donetsk və Xarkovda da nwmayiş etdirilmişdir.
Rasim Seydimov Şəkidə doğulmuş, sonra Ukraynaya köçərək, Krivoy Roqda rəssamlıq məktəbini bitirmişdir. İstedadlı Azərbaycan rəssamının əsərləri Vladimir-Volınsk rəsm muzeyinin fondunda, Azərbaycan, Ukrayna, Rusiya, ABŞ və Böyük Britaniyada şəxsi kolleksiyalarda saxlanılır.
Sərgidəki əsərlərin Xocalı faciəsinin ağrılarını dolğun əks etdirir: “Ağrı”, “Ailə”, “İnilti”, “Daha həyat yoxdur”, “Məhvetmə”, “Ölüm”, “Xarabalıq”, “Uşaqlar” və sair.
Azərbaycanın Ukraynadakı səfiri Tələt Əliyev, UAK Kiyev təşkilatının sədri Oleq Krapivin, UAK-ın sədri Akif Gülməmmədov, UADBXF-nin prezidenti İlqar Abbasov, Peçorsk Rayon Şurasının deputatı Vilayət Quliyev və başqaları Xocalı faciəsinin tarixindən, şəhərin dinc əhalisinin vəhşicəsinə qətlə yetirilməsindən danışmışlar. Tələt Əliyev və Oleq Krapivin Xocali soyqırımı barədə həqiqətlərin dünya ictimaiyyətinə çatdırılmasında Heydər Əliyev Fondunun rolunu xüsusi vurğulamışlar.
Tanınmış Ukrayna siyasətçisi Anatoli Raxanski çıxışında faciə ilə bağlı dərin kədərini ifadə etmiş, bildirmişdir ki, Xocalı faciəsi qurbanlarının xatirəsinə ən yaxşı abidə çiçəklənən və demokratik Azərbaycandır.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
