Konqoda Ebola virusundan ölənlərin sayı 131 nəfərə çatıb
Qahirə, 19 may, AZƏRTAC
Konqo Demokratik Respublikasında Ebola virusundan ölənlərin sayı 131 nəfərə çatıb.
AZƏRTAC xəbər verir ki, Konqonun səhiyyə nazirinin açıqlamasına əsasən, ümumilikdə, 513 nəfərin virusa yoluxduğu ehtimal olunur.
Ebola virusunun sürətlə yayılması Ümumdünya Səhiyyə Təşkilatının (ÜST) rəhbərliyində ciddi narahatlıq yaradıb. ÜST Konqoda və Uqandada Ebola virusunun yayılması ilə əlaqədar beynəlxalq əhəmiyyətli fövqəladə vəziyyət elan edib.
ÜST-nin Baş direktoru Tedros Adhanom Qebreyesus epidemiyanın miqyası və yayılma sürətindən ciddi şəkildə narahat olduğunu bildirib. Qeyd edib ki, vəziyyətlə bağlı tövsiyələrin hazırlanması məqsədilə fövqəladə hallar komitəsinin iclası keçiriləcək. Fövqəladə hallar komitəsinin iclasının gün ərzində baş tutması planlaşdırılır.
Təşkilat daha əvvəl yaydığı açıqlamada bildirmişdi ki, Konqoda və Uqandada yayılan Ebola virusu beynəlxalq narahatlıq doğuran fövqəladə vəziyyət yaratsa da, pandemiya səviyyəsinə çatmayıb.
Xatırladaq ki, əvvəlki hesabatlarda Konqoda Ebola virusu nəticəsində 88 nəfərin öldüyü, 300 nəfərin isə virusa yoluxduğunun ehtimal edildiyi bildirilirdi. Uqandada isə 1 ölüm və 1 yoluxma şübhəsi qeydə alınmışdı.
Son 50 ildə Ebola virusu Afrikada 15 mindən çox insanın həyatına son qoyub.
Qeyd edək ki, Konqo Milli İctimai Səhiyyə İnstitutunun direktoru Dyedonne Mvamba Kazadi ötən ilin dekabrında Konqo Demokratik Respublikasında Ebola epidemiyasının faktiki olaraq başa çatdığını elan etmişdi.
Bölmənin digər xəbərləri
