“KORRUPSİYA İLƏ ƏLAQƏDAR HÜQUQPOZMALAR VƏ VƏZİFƏLİ ŞƏXSLƏRİN MƏSULİYYƏTİ” MÖVZUSUNDA DƏYİRMİ MASA KEÇİRİLMİŞDİR
Mərkəzində Azərbaycan Gənc Hüquqşünaslar Birliyinin (AGHB) təşkilatçılığı ilə “Korrupsiya ilə əlaqədar hüquqpozmalar və vəzifəli şəxslərin məsuliyyəti” mövzusunda dəyirmi masa keçirilmişdir.
AGHB-nin sədri Nadir Adilov ATƏT-in və Avrasiya Fondunun Bakı təmsilçiliklərinin dəstəyi ilə korrupsiyaya qarşı mübarizə sahəsində artıq altı dəyirmi masanın, müxtəlif təlimlərin keçirildiyini, internet səhifəsinin yaradıldığını, layihə çərçivəsində son tədbirin dekabrın 23-də təşkil olunacağını və həmin dəyirmi masada beynəlxalq donor təşkilatlarının dəstəyi ilə bugünkü mövzu üzrə layihələr həyata keçirən qeyri-hökumət təşkilatları rəhbərlərinin görülmüş işlər barədə məlumat verəcəklərini diqqətə çatdırmışdır.
Milli Məclisin deputatı Bəxtiyar Əliyev və respublika baş prokuroru yanında Korrupsiyaya Qarşı Mübarizə İdarəsi analitik-informasiya şöbəsinin prokuroru Mübariz Əhmədov hüquqi dövlətin inkişafı üçün tam sağlam münasibətlərin qurulması və təmin edilməsi vəzifələrindən danışmış, korrupsiyaya qarşı mübarizənin əhəmiyyətini vurğulamışlar. Natiqlər dövlətimizin bu sahədə müvafiq konvensiyalara qoşulduğunu və özünün milli qanunvericiliyini həmin sənədlərə tam uyğunlaşdırdığını, korrupsiyaya qarşı mübarizə haqqında qanundan irəli gələn tələblərin artıq yerinə yetirildiyini, həm korrupsiyaya qarşı mübarizə üzrə komissiyanın, həm də baş prokurorun yanında müvafiq qurumun yaradıldığını nəzərə çarpdırmışlar.
Tədbirdə ABŞ Hüquqşünaslar Birliyinin üzvü Robert Eysman dünyanın bütün ölkələrində korrupsiyanın mövcudluğunu qeyd edərək söyləmişdir ki, sadəcə, dövlət bu bəlanı azaltmaqda maraqlı olmalı, bütün ictimaiyyət mübarizəyə qalxmalıdır. O, Azərbaycanda korrupsiyaya qarşı dövlət səviyyəsində mübarizə əzminin yüksək olduğunu bildirmişdir.
Dəyirmi masada çıxışlar ətrafında geniş müzakirələr aparılmış, kütləvi informasiya vasitələri nümayəndələrinin sualları cavablandırılmışdır.
