SİYASƏT
Krımda İkinci Dünya müharibəsində həlak olmuş azərbaycanlı döyüşçülərin xatirəsi yad edilmişdir
Bakı, 11 may (AZƏRTAC). Krım yarımadasının müxtəlif regionlarında yaşayan Azərbaycan diasporunun nümayəndələri Sevastopoldakı (Ukrayna) Sapun-qorada Azərbaycan döyüşçülərinin şərəfinə ucaldılmış memorial kompleksin yanında toplaşaraq İkinci Dünya müharibəsində həlak olanların xatirəsini yad etmişlər. Bu barədə AZƏRTAC-a Krım Azərbaycan İcmasının başçısı Rəhim Hümbətov məlumat vermişdir.
Müharibə illərində Krım torpağında Azərbaycanın neçə-neçə igid oğul və qızlarının qanı tökülmüşdür. Anım mərasiminə toplaşanlar Krımın, Sevastopolun, Ukraynanın faşistlərdən azad edilməsi uğrunda canlarından keçmiş minlərlə azərbaycanlının xatirəsini ehtiramla yad etmişlər.
Mitinqdə yarımadanın müxtəlif regionlarından döyüşən ordu sıralarına çağırılmış azərbaycanlıların adları oxunmuşdur. Tədbirdə Rusiyadan – Moskva və Həştərxandan gəlmiş qonaqlar da iştirak etmişlər.
Xatırladaq ki, Krım Azərbaycan İcması 1991-ci ildən bəri hər il mayın 9-da İkinci Dünya müharibəsi illərində yarımadada hərbi əməliyyatların fəal iştirakçısı olmuş 77-ci Azərbaycan diviziyasının döyüşçülərinin şərəfinə ucaldılmış abidənin önündə mitinq təşkil edir.