KÜR ÇAYININ AĞDAŞ RAYONUNDAN KEÇƏN HİSSƏSİNDƏ BƏNDBƏRKİTMƏ İŞLƏRİ GÖRÜLÜR
Ağdaş, 7 iyun (AZƏRTAC). Son vaxtlar Kür çayında suyun səviyyəsinin artması ilə bağlı Ağdaş rayonunda da xüsusi qərargah yaradılmışdır.
Rayonun Kürqırağı zonasında yerləşən Kotavan, Xınaxlı, Ağzıbir, Pirəzə, Abad, Eymur və Qaradeyin kəndləri üçün yarana biləcək təhlükənin qarşısı vaxtında alınmışdır.
Ağdaş rayon İcra hakimiyyəti başçısının birinci müavini, rayon fövqəladə hallar komissiyasının sədri Cavid Osmanovun rəhbərliyi ilə Pirəzə kəndində yaradılan operativ qərargah tərəfindən gün ərzində bir neçə dəfə Kürdə suyun səviyyəsi ölçülür, vətəndaşların müraciətləri yerindəcə araşdırılır, təhlükə yarana biləcək ərazilərə baxış keçirilir və lazımi tədbirlər görülür.
Qərargahın rəhbəri Cavid Osmanov bildirmişdir ki, rayonun daxili imkanları hesabına, idarə və təşkilatların, eləcə də yerli əhalinin köməyi sayəsində Kür çayının Ağdaş rayonu ərazisindən keçən hissəsində əsas və köməkçi bəndlərdə qabaqlayıcı tədbirlər görülmüş və yarana biləcək təhlükənin qarşısı alınmışdır. Bu günədək ümumilikdə bir kilometr uzunluğunda bəndbərkitmə işləri görülmüşdür. Kürqırağı kəndlərin bəzi ərazilərinə, əkin sahələrinə dolan süxur suları qurudulmuş, daşqınla bağlı təhlükə tam aradan qaldırılmışdır.
Hazırda Kür çayının Ağdaşdan keçən hissəsində suyun səviyyəsi bəndin üzərindən bir metr aşağıdadır.
Bölmənin digər xəbərləri
