Kür çayının aşağı axınında suyun səviyyəsi artmışdır
Bakı, 8 fevral (AZƏRTAC). Ekologiya və Təbii Sərvətlər Nazirliyi çayların suluğu ilə bağlı apardığı araşdırmanın nəticələrini açıqlamışdır.
Nazirliyin mətbuat xidmətindən AZƏRTAC-a bildirmişlər ki, araşdırmanın nəticələrinə görə, Böyük Qafqazın Quba-Xaçmaz bölgəsi çaylarında sululuq ongünlük normanın 90-240, Kiçik Qafqazın çaylarında 50-180, Lənkəran-Astara bölgəsi çaylarında 20-190, Naxçıvan Muxtar Respublikası çaylarında isə 60 faizini təşkil etmişdir.
Fevralın 8-də Kür çayının Qıraqkəsəmən məntəqəsində suyun səviyyəsində 2 santimetr artım qeydə alınmışdır. Məntəqədə su sərfi saniyədə 135 kubmetr olmuşdur. Qanıx çayının Əyriçay məntəqəsində isə suyun səviyyəsi 2 santimetr azalmışdır. Hazırda məntəqədə su sərfi saniyədə 67 kubmetrdir.
Son 4 gün ərzində Kür çayının aşağı axınındakı Surra məntəqəsində suyun səviyyəsində 75, Şirvanda 82, Bankədə 21, Araz çayının Novruzlu məntəqəsində isə 61 santimetr artım müşahidə olunmuşdur. Kür çayının Salyandan keçən hissəsində isə fevralın 8-də suyun səviyyəsi 20 santimetr artmışdır.
Bütün məntəqələrdə suyun səviyyəsinin ötən ilin müvafiq dövrü ilə müqayisədə aşağı olduğu müəyyən edilmişdir.
Bölmənin digər xəbərləri
