KÜR VƏ ARAZ ÇAYLARINDA SUYUN SƏVİYYƏSİ AŞAĞI DÜŞMÜŞDÜR
İmişli, 29 may (AZƏRTAC). Kür və Araz çaylarında suyun səviyyəsi aşağı düşmüşdür. Fəlakət zonasında vəziyyət stabilləşir. Kür çayının Sabirabad rayonu ərazisindən keçən hissəsində suyun səviyyəsi 55 santımetrə qədər enmişdir. Ərazidə qabaqlayıcı tədbirlər davam etdirilir. Araz çayının tarixi məcrasının bərpası istiqamətində də işlər sürətləndirilmişdir.
Dövlət komissiyasının üzvləri mayın 28-də əraziyə gələrək yeni qolda görülən işlərlə tanış olmuşlar.
Baş nazirin müavini Abid Şərifov bildirmişdir ki, Araz çayının yeni qolu bütün hazırlıq işləri yerinə yetirildikdən sonra açılacaqdır. Prezident İlham Əliyevin dediyi kimi insanların təhlükəsizliyi hər şeydən önəmlidir. Biz buna əmin olmasaq suyu buraxmaq məsələsi bir neçə gün uzana bilər.
Fövqəladə hallar naziri Kəmaləddin Heydərov bildirmişdir ki,
dövlətimizin başçısının qarşımıza qoyduğu əsas tapşırıq ölkəyə daxil olan suların idarə olunan sistemlə paylaşdırılması proqramının hazırlanmasıdır. İşlər yekunlaşandan sonra Araz çayında su yeni qolla hissə-hissə buraxılacaqdır. Yeni su kanalının keçdiyi istiqamətdə isə problem yarada biləcək maneə yoxdur. Araz çayının yeni kanalla axması ətrafda bitki örtüyünün və kənd təsərrüfatının inkişafına da kömək edəcəkdir.
Qeyd edək ki, İmişli, Saatlı və Sabirabad rayonlarında ümumi vəziyyət stabildir. Yarana biləcək təhlükənin aradan qaldırılması istiqamətində zəruri tədbirlər görülür.
Bölmənin digər xəbərləri
