KÜR VƏ ARAZ ÇAYLARINDA SUYUN SƏVİYYƏSİ ENMƏKDƏ DAVAM EDİR
Sabirabad, 10 iyun (AZƏRTAC). Kür və Araz çaylarında suyun səviyyəsi enməkdə davam edir. Arazda suyun səviyyəsi gözlənildiyindən də aşağı düşdüyü üçün yeni qolun bağlanmasına ehtiyac yaranmışdır. Bölgədə isə təbii fəlakətin nəticələri aradan qaldırılmaqdadır.
Qabaqlayıcı tədbirlər çərçivəsində bölgədə tikilən körpüləri vurğulamaq yerinə düşər. Bunlardan biri artıq istifadəyə verilən Bəhrəmtəpə-Biləsuvar müvəqqəti körpüsü, digərləri isə Ələt-Astara avtomobil yolu üzərində və Salyanla Biləsuvar rayonlarını birləşdirəcək körpülərdir. Biləsuvar ərazisində inşa olunan 9 aşırımdan ibarət körpünün eni 14, uzunluğu 82 metrdir. Körpü 5 günə istifadəyə veriləcəkdir.
Mayın 31-də bərpa olunan Arazın tarixi məcrasının iyunun 9-da bağlanması qərara alınmışdır. Buna səbəb qolda suyun azalması və ətraf rayonların su ilə təminatında problem yaranmasıdır.
Xatırladaq ki, Arazın yeni qolu İmişli, Biləsuvar, Neftçala, Cəlilabad, Masallı və Lənkəran rayonlarından keçməklə, Xəzər dənizinə qovuşmalı idi.
Bölmənin digər xəbərləri
