KÜRDƏMİRDƏ KEÇİRİLMİŞ UMUMRAYON TƏDBİRİNDƏ XOCALI SOYQIRIMI QURBANLARININ XATİRƏSİ ANILMIŞDIR
Kürdəmir, 26 fevral (AZƏRTAC). Fevralın 26-da Kürdəmirdə Xocalı soyqırımının on yeddinci ildönümü ilə bağlı ümumrayon tədbiri keçirilmişdir.
Mərasim iştirakçıları əvvəlcə Qarabağ uğrunda şəhid olanların uyuduğu “Şəhidlər xiyabanı”nı ziyarət etmiş, məzarları üstünə tər çiçəklər qoymuşlar.
Tədbirin keçirildiyi şəhər 2 nömrəli orta məktəbin foyesində soyqırımı əks etdirən kitab və rəsm sərgisi açılmışdı.
Xocalı faciəsi qurbanlarının xatirəsi bir dəqiqəlik sükutla yad edildikdən, soyqırımla əlaqədar filmin nümayişindən sonra şagirdlərin ifasında ədəbi-bədii kompozisiya təqdim olunmuş, şeirlər səsləndirilmişdir.
Tədbirin sonunda rayonda məskunlaşmış Xocalı ailələrinə maddi yardım göstərilmişdir.
######
Bölmənin digər xəbərləri
