Kürdəmirdə “Soyqırımı tarixinin dastanı” kitabının təqdimatı olmuşdur
Bakı, 30 mart (AZƏRTAC). Azərbaycanlıların soyqırımı günü ilə bağlı Kürdəmirdə keçirilən tədbirlər çərçivəsində martın 30-da “Əməkdar Mədəniyyət İşçisi”, şair - dramaturq İftixarın “Soyqırımı tarixinin dastanı” adlı yeni kitabının təqdimatı olmuşdur.
AZƏRTAC xəbər verir ki, Kürdəmir ictimaiyyəti nümayəndələrinin, ziyalıların iştirak etdikləri tədbirdə rayon mədəniyyət və turizm şöbəsinin müdiri Vaqif Alıyev yeni nəşr və onun yüksək ideya dəyərləri barədə ətraflı məlumat vermişdir.
Mərasimdə çıxış edənlər tarixi faciələrimizi özündə əks etdirən əsrin yüksək məziyyətləri haqqında fikirlərini söyləmişlər.
Türkiyədə fəaliyyət göstərən Beynəlxalq Azərbaycan Kültür, Dil, Tarix Araşdırma Mərkəzinin rəhbəri Seyfəddin Ayakyay mərasimdə çıxış edərək təqdimatı keçirilən kitabın əhəmiyyətini yüksək qiymətləndirmişdir. Qonaq tarixi soyqırımı hadisələrinin bütün türk dünyasının ağrı - acısı, kədəri olduğunu vurğulamış, bu istiqamətdə Türkiyə - Azərbaycan birgə mübarizəsinin tarixi əhəmiyyətindən söhbət açmışdır.
Kürdəmir Rayon İcra Hakimiyyətinin başçısı İrşad Əliyev ermənilərin zaman-zaman xalqımıza qarşı yürütdükləri soyqırımı və etnik təmizləmə siyasətini ifşa edən belə bir sanballı əsəri ərsəyə gətirdiyinə görə müəllifə rayon əhalisi adından minnətdarlığını bildirmişdir.
Bölmənin digər xəbərləri
