Bakı, 13 may, AZƏRTAC

Ulu Öndər Heydər Əliyevin anadan olmasının 101-ci ildönümü münasibətilə ölkəmizin Küveytdəki səfirliyinin təşəbbüsü ilə bu ölkənin “əl-Nahar”, “əs-Siyasə” qəzetlərində, www.q8-press.com və www.annaharkw.com elektron xəbər portallarında “Azərbaycan Respublikasının Ümummilli Lideri, Prezident Heydər Əliyevin anadan olmasından 101 il ötür” və “Azərbaycan və Küveyt... 30 illik sıx əlaqələr” sərlövhəli geniş məqalələr dərc edilib.

AZƏRTAC xəbər verir ki, məqalələrdə iki dost ölkə arasında sıx tarixi, mədəni və dini bağların mövcudluğu, bugünkü yüksək səviyyədə münasibətlərin isə məhz Ulu Öndər Heydər Əliyevin səylərinin bəhrəsi olduğu diqqətə çatdırılır.

Küveyt mediası vurğulayır ki, bu gün Azərbaycan regionun lider dövlətidir, eyni zamanda torpaqlarını öz gücü ilə 30 illik işğaldan azad edən qalib ölkədir. Prezident İlham Əliyev Ulu Öndər Heydər Əliyevin siyasi kursunu uğurla davam etdirir.

Məqalələrdə Azərbaycanın beynəlxalq nüfuzundan, müxtəlif ölkələrlə, o cümlədən 30 illiyi qeyd olunan Küveytlə diplomatik əlaqələrindən bəhs olunur. Müəlliflər diqqətə çatdırıblar ki, 1994-cü il dekabrın 13-də Azərbaycan xalqının Ümummilli Lideri Heydər Əliyev İKT Zirvə görüşündə iştirak etmək üçün Mərakeşdə səfərdə olarkən Küveyt əmiri Şeyx Cabir Əl-Əhməd Əl-Sabahla görüşüb və bununla da iki ölkə arasında əlaqələrin əsası qoyulub. Dövlət başçıları arasında daha sonra 1995-ci ilin mart ayında Kopenhagendə və həmin ilin oktyabrında ABŞ-da səmimi görüşlər baş tutub və müzakirələr aparılıb. Küveyt Dövləti Ermənistanla münaqişənin ilk illərində Azərbaycan qaçqınlarına humanitar yardımlar göstərib və Azərbaycanda həyata keçirilən bir sıra layihələrin maliyyələşdirilməsində iştirak edib. Azərbaycan Respublikası və Küveyt Dövləti həm ikitərəfli əsasda, həm də BMT, Qoşulmama Hərəkatı, İslam Əməkdaşlıq Təşkilatı, OPEC+ kimi təşkilatlar çərçivəsində yaxından əməkdaşlıq edirlər.

Məqalələrdə Ulu Öndərin mənalı həyat yolu və zəngin siyasi fəaliyyəti, onun təşəbbüsü ilə həyata keçirilən “neft strategiyası”, transmilli layihələr barədə geniş məlumat verilib.

Yazılarda vurğulanıb ki, Azərbaycan Prezidenti İlham Əliyev Heydər Əliyevin dövlətçilik kursunu uğurla davam etdirir. Onun 2009-cu il fevralın 10-da Küveytə rəsmi səfəri ilə ikitərəfli əlaqələr yeni müstəviyə qədəm qoyub. Azərbaycanın dövlət başçısının Küveyt Dövlətinin Əmiri şeyx Sabah əl-Əhməd əl-Cabir əs-Sabahla görüşündə iki ölkə arasında münasibətlərin inkişaf etdiyi, siyasi əlaqələrin yüksək səviyyədə olduğu bildirilib. Küveyt Əmiri Prezident İlham Əliyevə ölkəsinin ən ali mükafatı olan "Mübarək əl - Kəbir" ordenini, Azərbaycan Prezidenti isə Əmirə Azərbaycanın ali mükafatı olan "Heydər Əliyev" ordenini təqdim edib.