Küveytdə həyata keçirilmiş robotik cərrahiyyə əməliyyatı Ginnesin Rekordlar Kitabına düşüb
Qahirə, 3 oktyabr, AZƏRTAC
Küveytin “Cabir əl-Əhməd” xəstəxanası ilə Braziliyadakı “Cruz Vermelha” xəstəxanası arasında robot vasitəsilə həyata keçirilmiş cərrahi əməliyyat ən uzun məsafəli robotik əməliyyat kimi Ginnesin Rekordlar Kitabına düşüb.
AZƏRTAC “əl-Cəridə” qəzetinə istinadla xəbər verir ki, qasıq yırtığı üzərində edilən əməliyyat “Zain” beynəlxalq yüksək sürətli şəbəkə infrastrukturunun köməyi ilə və robot vasitəsilə 12034,92 kilometr məsafədən uğurla icra edilib.
Hadisə ilə bağlı Küveyt tərəfinin yaydığı birgə mətbuat açıqlamasında qeyd olunub ki, Ginnesin Rekordlar Kitabının rəsmi sertifikatı səhiyyə naziri Əhməd əl-Avadi, tibbi personal, həmçinin “Zain” və Elmi İnkişaf Fondunun nümayəndələrinə təqdim edilib.
Əməliyyat Küveyt tərəfindən həkimlər Süleyman əl-Müzeydi, Muhənnəd əl-Həddad və Həmud ər-Rəşidinin rəhbərliyi ilə, braziliyalı həkimlərdən Marselo Lureyro və Leandro Toti Kavazolanın iştirakı ilə həyata keçirilib.
Diqqətə çatdırılıb ki, əməliyyat qitələrarası rabitədə cəmi 199 millisaniyə gecikmə ilə uğurla və təhlükəsiz icra olunub.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
